Heime på Fosshaugane har det gått 85 minutt av kampen mot Rosenborg som då leia 0-1. Etter ein situasjon inne i feltet bles dommar Kjetil Sælen i fløyta.
Ole Jørgen Halvorsen legg ballen til rette, skyt og sikrar eitt poeng for Sogndal. Deretter har det vore tyst i dommarfløyta i straffefavør for Sogndal. Det er statistikarane i Opta Nor som har funne tala for NRK.
Den syner at Sogndal er det einaste tippeligalaget som ikkje fekk ei einaste straffe verken i 2012, eller hittil i 2013. Nærast kjem Strømsgodset og Vålerenga, som fekk kvar si straffe den 24. serierunden i 2012.
– Dei større laga med pondus og litt meir «trøkk» rundt seg får nok meir merksemd. Det kan vere ein medverkande årsak til at dei små laga får færre straffespark tildelt. I tvilstilfelle, så er det nok noko i at dei små laga får færre straffer enn dei skulle hatt, seier sportsleg koordinator i Sogndal Fotball, Håvard Flo, til NRK.
– Det var ingen kontakt
Kjenslene har vore sterke i Sogndal Fotball dei siste dagane etter bortekampen mot Lillestrøm.
Sogndal låg an til å ta tre sterke poeng då Fredrik Gulbrandsen på akrobatisk vis snublar i straffefeltet. Dommar Trygve Kjensli bles og Petter Vågan Moen set ballen i mål, kampen endar 2-2.
– Det var ingen kontakt. Det skulle ikkje vore dømt straffe, sa Gulbrandsen til TV2 etter kampen.
– Eg er sikker på at han skal ta ut beinet og felle meg, men det gjorde han ikkje. Da fall eg, og da blir det jo filming. Rett og slett, utdjupar Gulbrandsen.
- LES OGSÅ:
- LES OGSÅ:
Olsson var rasande
Sogndal-trenar Jonas Olsson er vanlegvis ein sindig svenske. Men etter LSK-kampen var han rett og slett rasande.
– No har eg vore trenar for Sogndal i 38 kampar i eliteserien og vi har enno ikkje fått eit straffespark, men vi har fått mange imot oss, sa Olsson.
Han hevdar at det er eit problem i mange ligaer, også i den norske eliteserien, at dei små laga får færre straffer.
– Dommarane er nøytrale
Toppdommarsjef Rune Pedersen ville før helga ikkje kommentere den aktuelle situasjonen på Åråsen. Men han slo fast at dommarane har god kompetanse på det dei gjer på bana.
– Alle skal vere trygge på at våre dommarar er nøytrale og kun dømme ut frå det dei ser på bana, sa Pedersen.
Patronen står over
I kveld møter Sogndal Odd Grenland heime på Fosshaugane. Der må dei i kveld klare seg utan midtbanesjefen Hannu Patronen. Han fekk sitt andre gule kort, og dermed raudt, i kampen mot LSK og må stå over.
Dermed opnar det opp for at supertalentet Bjørn Inge Utvik (17) kan få sin eliteseriedebut. Utvik kom frå Haugesund FK til Sogndal i starten av april.
Lund startar
– Bjørn Inge Utvik er eit av dei råaste midtstoppartalenta i landet, og det er ein grunn til at me henta han. Det er soleklart at han er eit av alternativa, seier Tom Mangersnes, assistenttrenar i Sogndal.
Men i følgje Håvard Flo er det Espen Næss Lund som startar kampen i dag, med Utvik på benken. Han gjorde eit godt innhopp i kampen mot Lillestrøm.
– Han blir Hannu Patronen sin vikar i dag, sler Flo fast.