– Eg stod med vatn til knea og ropte at folk måtte gå av isen

– Det var så dårleg lys, at arrangørane ikkje greidde å fanga opp at det samla seg alt for mange folk på isen, fortel Hjalmar «Hjallis» Andersen, som i dag fyller 90 år.

Dagen han snakkar om er det snart 60 år sidan, på ei tid då «Hjallis» var ei stjerne på nivå med Justin Bieber i dagens målestokk.

Og når det blei kjent at mannen, som hadde sanka tre OL-gull i Oslo, skulle koma til Stavanger for å delta i eit skøyterenn på Mosvatnet var det derfor ikkje få som ville møta opp.

• SJÅ VIDEO: Hjallis vinner OL-gull på 1500 meter
• Les òg: I dag er det 60 år sidan «Hjallis» blitz-fall

Isen sprakk

Historiene som har vandra i ettertid vil ha det til at om lag 30.000 fann vegen ut på isen i mildvêret 20. februar i 1954.

• Gratuler «Hjallis» med dagen i kommentarfeltet!

– Eg ser ikkje vekk frå at dette talet kan stemma, for det var aldeles utruleg mykje folk, seier «Hjallis».

30.000 eller ikkje. Det var i alle fall meir folk enn isen kunne bera.

Ein av dei som stod i publikum var Thomas Middelthon.

– Interessa for skøytesport den gong var gigantisk, og Hjalmar Andersen var større enn Northug og Bieber til saman, fortel mannen som då berre var ein gutunge.

• SJÅ VIDEO: Hederspris til Hjallis og Kuppern

– Det var tusenvis av folk på isen, og dei sokk djupare og djupare. Det var ein komedie utan sidestykke å sjå på alle fedrane i frakk og hatt som stod til knea i vatn, men dei ville likevel stå der å sjå, så dei gjekk opp på benkene.

– Men så sa det plutseleg bang. Det var eit skrall ein kunne høyra på heile Mosvatnet, og det kom ein svær brest i isen, først då byrja folk å springa i panikk.

SJÅ VIDEO:

Jentene følgde etter «Hjallis»

Også «Hjallis» fortel om hendinga med stor innleving.

– Eg stod med vatn til knea, og ropte at folk måtte gå av isen. Etter den sprakk byrja meg og Roald Edgar Aas å springa mot Hotell Astor, for å koma oss i hus.

Men då folk såg kva retning stjerna sprang i, kasta dei seg på og sprang etter.

– Dermed sprang plutseleg alle mot Alstor. Det blei laga ein sketsj om ei dame som kom springane og tok på meg i flukta. Ho stoppa opp og ropte; 'Eg har tatt på han, eg har tatt på han!', fortel jubilanten og ler.

Til slutt kom «Hjallis» og Aas seg inn på hotellet, men noko skøyteløp blei det ikkje.

– Det var ei stor oppleving, og det er ein historie du alltid tar med deg. Eg sprang ikkje etter «Hjallis» mot Hotell Alstor, men tok heller mine eigne skøyter og skøyta heim mot Eiganes, fortel Middelthon.

Han meiner at historia er heilt på høgde med då Oddvar Brå brakk staven.