– Stein har vore mitt idol hele mitt liv, seier Otto Tschudi om sin ven gjennom mange år, Stein Eriksen, som døydde i natt.
– Eg var ikkje meir enn tre år gammal då Stein tok sit OL-gull like utanfor døra der eg sit no, seier Tschudi på telefonen frå hotellet på Norefjell. Tschudis selskap har nettopp kjøpt det gamle anlegget der.
Det var der dei alpine konkurransane gjekk i 1952, og det var der Stein Eriksen overraskande slo alle mellomeuropearane i storslalåm. I slalåm gjekk det ikkje så mykje dårlegare, han tok sølv.
– Vi har halde kontakt heile livet, og snakkast kvar månad. Eg snakka med han for berre nokre dagar sidan. Han var svak dei siste dagane, seier Tschudi.
– Han var eit fantastisk menneske og hugsa på alle.
Tschudi var sjølv aktiv alpinist i nærmare 25 år, både før og etter at verdscupen var etablert. Han fekk med seg eit NM-gull i 1969 og OL-startar både i 1968 og 1972. Seinare flytta han også til USA, og bur no i San Francisco.
Talte for dei tilsette for få dagar sidan
For berre nokre få dagar sidan var Stein Eriksen på skisenteret han dreiv og snakka med dei tilsette.
– Han heldt ei fin tale på ti minutt og fortalde korleis det stod til, fortel Tschudi.
Eriksen hadde parkinsons sjukdom, ein sjukdom som gjer at ein gradvis mister kontrollen over musklane.
– Dagen etter 80-årsdagen hadde han eit skiuhell, og det sette nok det heile i gang. Seinare blei han verre etter kvart.
– Men han var heile tida heilt klar, og alltid i godt humør.
Stein Eriksen var den første med skiprogram på nasjonalt tv i USA, med skitips på kanalen ABC.
– Han var med på å få skisporten til å vekse til ein «glamorous sport».
Genser som mor strikka
– Han køyrde alltid utan lue og med marius-genser som hans mot Bitten hadde strikka. han var eit idol for mange i skisporten i Amerika, fortel Otto Tschudi.
– Han har nok gjort meir for skisporten i Amerika enn i Norge, fordi han flytta til USA i 50-åra.
– For meg var han eit idol med gode verdiar – både som toppidrettsman og måten han var overfor andre menneske. Og ikkje minst hans framferd ute i det offentlege rom. Det er mange som ikkje tenkjer på korleis dei er i kvardagslivet, seier Tschudi.