– Det blir «showdown». Det blir «rumble in the jungle». Det blir som den historiske boksekampen mellom George Foreman mot Muhammad Ali, og dette skjer i Oslo, seier eks-sprinter John Ertzgaard lattermildt.
Tidlegare i år blei det klart at verdas raskaste mann, Usain Bolt, også denne sesongen kjem for å konkurrere under Bislett Games.
– Asafa er den beste
Og konkurrentane frå same nasjon er ikkje bare dei beste sprintarane i si tid, meiner Ertzgaard.
– Vi får dei to beste sprintarane på planeten gjennom tidene. Powell er verdas beste, meiner eg. Han har bare ikkje fått vist det enno. Og Bolt er jo verdsrekordhaldar.
Bare amerikanske Tyson Gay skil hurtigtogene med legendestatus i friidrettshistoria (sjå faktaboks). Han kjem riktig nok ikkje til Bislett Games.
Det gjør derimot to stjerner som no ligg rundt sin absolutt beste sprintalder.
– I sprint er ein eigentleg på ein absolutt topp når ein er rundt 27–28 år. Usain er 25. Asafa er 29, men det spesielle med han er at han ikkje er på veg ned heilt enno. Ein har jo sett tidlegare gigantar som Linford Christie springe fort i ein alder over 30, så Powells alder er eg ikkje bekymra for, seier Ertzgaard.
– Ein million i kø for å sjå dei i OL
Å hanke inn slike profilar, som også er i ein høgst ideell konkurransealder, kostar mykje. Arrangøren innrømmer at jamaicanarane vil ta store delar av stemnebudsjettet.
Men likevel forsvarar Bislett Games-arrangør Steinar Hoen stjernesigneringane.
– Til OL i London står ein million menneske på venteliste for å få billett til 100 meterfinalen for menn. Eg trur ikkje folk skjønnar kor stort det er å få desse to til Bislett, bare seks og ei halv veke før leikane i Storbritannia, seier Hoen.
VIDEO: Sjå Bolt regjere under Bislett Games i 2011. Saka held fram ...
– Perfekt tidspunkt for raske tider
Og akkurat tidspunktet er perfekt med tanke på at publikum kan få sjå raske tider av Bolt og Powell, trur både Hoen Ertzgaard.
Utøvarane konkurrerer nemleg like framfor den mest hektiske oppkøyringstida før OL, eit meisterskap dei set høgare en alt anna.
– Det er ikkje for tett opp mot OL, noko som gjør at vi kan forvente gode tider. Seks veker før ein stor meisterskap har utøvarane ofte ein liten konkurranseperiode der dei prøver å toppe tidene litt, for så å gå i hardtrening, seier Hoen.
– Vi er veldig heldig med datoen i år. Sidan OL kjem ein månad etter Bislett Games, og ikkje to månader etter som VM i Deagu var i fjor, kan vi vente oss utøvarar i toppform, legg Hoen til.
Rodal: – Vil vere livredde for å tape
Tidlegare OL-vinnar på 800 meter, Vebjørn Rodal, trur landsmennene og konkurrentane vil møte til start med frykt for det verste.
– Dei kjem til å vere livredde, og vil gjøre alt for å unngå tap. Bolt har mest å revansjere etter tjuvstarten under VM i fjor. Samstundes er Powell, som har gjort det dårleg i store meisterskap, god i enkeltstemner, seier ein spent Rodal.
For Bolt blir det nok aller viktigast å lykkast.
– I den perioden er eitt namn større enn alle andre – i alle idrettar. At Usain Bolt kjem til Oslo for å setje tittelen «verdas raskaste mann» på spel betyr at han vil vere hundre prosent skjerpa, seier Bislett-general Hoen.
– Det er ikkje bra å tape mot ein tidlegare verdsrekordhaldar når ein seinare skal forsvare fire OL-gull frå Beijing i 2008, legg Hoen til.
Eks-sprintar Ertzgaard er overbevist om at resultatet på Bislett vil vere den store peikepinnen på korleis det kjem til å gå i OL.
– Dette blir definitivt forsmaken på det som vil skje i London, avsluttar Ertzgaard.