– Det ligg vel litt i korta at vi hentar inn spelarar. Så får vi sjå om det blir ein eller to, eller kva det blir, seier Brandsdal til NRK.
Torsdag kveld sa medlemmane i IK Start ja til fem investorar.
Dei skal inn med inntil 40 millionar kroner over ein tiårsperiode. Ti av millionane vert spytta inn umiddelbart.
– Vi må jobbe med dei riktige vala for å sikre at vi rykker opp. Det betyr at vi hentar inn ein spelar eller to i sommarvindauget og styrkar oss, seier Brandsdal.
Kunne ha gått konkurs
Leigesoldatane Nigel Reo-Coker og Dany N'Guessan har allereie forlate Start etter få månader i klubben.
– Det er behov for å fylle opp stallen litt, seier direktøren.
Under det ekstraordinære årsmøtet torsdag kom det fram at økonomien i Start er langt meir anstrengt enn tidlegare kjent.
– Dersom vi ikkje går for dette er konsekvensen dramatisk. Vi kan gå konkurs og over ende. Det må eg vere veldig tydeleg på, sa styreleiar Geir Tønnesland.
– Kan skape tryggleik
Brandsdal vedgår at klubben hadde gått ein utfordrande sommar og haust i møte, dersom medlemmane hadde sagt nei til investorane.
– Hadde ikkje klubben henta inn kapital, hadde ting sett annleis ut. Då måtte vi ha jobba med sal av spelarar og andre tiltak som genererer inntekter, seier han.
– Det er ikkje vårt ynskje, og heller ikkje supporterane sitt ynskje. No kan vi skape tryggleik knytt til det sportslege, seier Brandsdal.