– Nabokatten kom med ei gåve til meg på døra søndag morgon. Eg så straks at denne spissmusa var større enn dei som kattane vanlegvis fangar nede i hekken.
Det seier Lene Benedicte Hagen Thorsen i Flekkefjord.
Ho er ikkje redd for mus, men heller ikkje veldig interessert i å få dei inn i stova.
Men denne spissmusa forstod ho raskt at ho måtte tilby husrom.
– Eg tok kontakt med ein forskar eg kjenner og som tidlegare hadde skrive om at dei trong opplysningar om og bilete av mus. Det stemte. Så no ligg nabopus sitt bytte i frysen min!
Og musa viser seg å vere ei husspissmus, som avisa Agder fyrst kunne fortelje om.
Lita mus – stor skade: Sjølv om ho er lita kan husspissmusa truleg gjere stor skade. Det er i alle fall det zoologar ynskjer å finne ut meir om.
Foto: HuspissmusHar venta i spenning
Forskaren er zoolog Beate Strøm Johansen på Naturmuseum og botanisk hage ved UiA.
Den sjeldne spissmusa er det fleire som har venta på.
– Vi zoologar har venta i spenning på når arten ville komme til Agder. Husspissmus er kjent frå Rogaland i cirka 20 år og har spreidd seg meir og meir.
Fagfolk trur ho kjem med last frå skip frå Sentral-Europa, som legg til kai i Rogaland.
– Arten har dei siste tiåra dukka opp i fleire land kor den ikkje er opphaveleg, truleg med hjelp frå menneske, seier Strøm Johansen.
Ho kan ikkje utelukke at det kan ha noko med klimaendringar å gjere.
– Mildare klima kan gjere at arten klarer seg betre i nordlege land, men dette må det forskast på.
Beate Strøm Johansen og kollegaene skal no undersøke husspissmusa.
Foto: Kai Stokkeland / NRKKan gjere skade
Og sjølv om det kanskje kan høyrast litt koseleg ut at husspissmusa har slått seg ned på Sørlandet, så kan ho altså gjere stor skade.
I tillegg til å fortrengje våre eigne norske spissmusarter kan ho ha med seg ein kjip blindpassasjer.
– Ein farleg bakterie som heiter leptospira, men vi veit ikkje om dei som allereie har kome til Noreg har med seg denne bakterien. Difor treng vi nokon daude individ for å ta DNA-testar.
Og no vil zoologane både analysere og kartlegge husspissmusa.
Spissmus et biller, sniglar og meitemark og har spisse tenner med raude tannspissar. Denne nye arten spissmus høyrer til ei anna slekt som har kvite tenner, og større øyre enn dei norske spissmusene. – Sidan denne nye arten spissmus er litt større enn våre opphavlege artar av Sorex-slekta, så kan våre artar bli utkonkurrert. Dette har skjedd i Irland, seier forskar Beate Strøm Johansen.
Foto: Lene Benedicte Hagen ThorsenTreng hjelp
Det er her folk, og ikkje minst katter på Agder, kan gjere eit viktig arbeid.
– Det er mogleg at husspissmusa allereie har spreidd seg endå lenger aust i Agder, så vi er heilt avhengige av at publikum sender oss bilete av daude spissmus som katten kjem med.
Og aller helst ynskjer zoologane at ein legg eventuelle spissmus i frysaren, slik at det er mogleg å ta prøver.
Kva synes du om den nye spissmusa?
Denne avstemningen viser ikke hva befolkningen mener om spørsmålet. Resultatet viser hva de som selv har valgt å stemme mener, og avstemningen har ikke et utvalg som gjør den representativ for alle som bor i landet.
– Sidan alle spissmus er ganske like av utsjånad er det best at folk frys ned alle daude spissmus dei finn. Husk lapp med funndata, oppmodar Strøm Johansen.
Ho kan i same slengen også opplyse om at mus og spissmus er to ulike ting:
– Spissmus er ei anna pattedyrgruppe som er insektetarar i slekt med piggsvin, medan mus er gnagarar. Tannsettet er heilt ulikt. Spissmus et biller, sniglar og meitemark og har spisse tenner med raude tannspissar.
Håper folk bidrar
Lene Benedicte Hagen Thorsen i Flekkefjord håpar andre på Agder vil gjere som ho, slik at ein får meir kunnskap om den framande spissmusarten.
– No håpar eg folk vil følgje med og undersøke byttet katten kjem heim med.
