Ifølgje obs-varselet er det Agder-fylka, Telemark, Oslo, Akershus, Buskerud, Østfold og Vestfold som får det verste uvêret her i landet.
– Det er allereie vått mange stader. Det vil faktisk bli lettare utover kvelden søndag. Det er først måndag føremiddag bygene vil auke, seier vakthavande meteorolog ved Meteorologisk institutt, Ingrid Bentsen til NRK.
– Slepp unna det verste
Det er stormen som har vore varsla tidlegare denne veka som er på veg. Det er Sør-Sverige, Danmark og Storbritannia som får det verste vêret, men også i Norge vil vi merke lågtrykket som er på veg.
– Lågtrykket vil gi storm i Storbritannia og Danmark. Langs kysten av Norge blir det nok stiv kuling, men vi slepp unna det verste, seier Bentsen.
Langs kysten heilt frå svenskegrensa til Mandal er det varsla 20–40 mm nedbør.
Det inneber risiko for høg vasstand, estimert til 40–70 centimeter over høgda som er oppgitt i tidevanntabellane.
– Det blir kortvarig. Det blir gradvis lettare frå måndag kveld og gjennom natta. Frå tysdag av blir det opphald att, seier meteorologen.
Sjølv om Sør- og Austlandet vil få det verste blir det regn over store deler av landet det kommande døgnet.
Verste i Storbritannia på fem år
I Sverige åtvara Sveriges meteorologiske institutt (SMHI) mot uvêret allereie laurdag. Også britiske meteorologar åtvarar mot fare for ekstremvêr i England og Wales.
Britiske The Guardian skriv at stormen kan bli den verste på fem år. Statsminister David Cameron har allereie forsikra seg om at beredskapen er på topp.
– Eg har nettopp hatt ei samtale med ulike offentlege etatar og organisasjonar for å høyre om planane for å sikre at menneske er sikra mot stormen, skriv han på Twitter.
Ifølgje avisa har forsikringsselskap i England og Wales bede kundane sine om å beskytte seg sjølv og eigedommane sine.