– Det talet er utruleg høgt. Anten du er båtførar eller bilførar utset du deg sjølv og andre for fare om du er rusa, seier dagleg leiar i alkovettorganisasjonen Av og til, til NRK.
Fungerande UP-sjef i Agder og Rogaland tykkjer det er bra at ruskøyrarane vert tekne, men trur også at mange slapp unna i helga.
– Det er alt for mange. Men eg er redd det berre er toppen av isfjellet. Kanskje spesielt til sjøs der sjansen for å bli teken nok er litt mindre, seier Rygg.
Halvparten tekne på Sørlandet
NRK har gått gjennom loggane til politiet i Hordaland, Rogaland, Agder, Telemark, Vestfold, Søndre Buskerud og Østfold.
Gjennomgangen viser at minst 33 bilførarar og 11 båtførarar er tekne for ruskøyring sidan fredag kveld. Altså til saman 44 tilfelle.
Nær halvparten er tekne på Sørlandet.
(OBS! Det kan vere fleire tilfelle som ikkje er registrert i loggane til politiet.)
18 førarar tekne berre i Agder
Berre i Agder-fylka vart ni bilførarar tekne for ruskøyring. På sjøen vart ni båtførarar stoppa og mistenkt for promillekøyring.
– Det er fleire enn normalt. Det er sommar og vi veit at folk drikk meir enn elles i året, seier Rygg.
Kommunikasjonssjef Frode Pedersen i Redningsselskapet ber folk tenke seg om før ein set seg i båten rusa.
– Vår klare oppfordring er at du ventar med å drikke til du har sleppt ankeret. Så kan ein kose seg. Vi har sjølvsagt ikkje noko imot at folk nyt ein god kvitvin i hyggeleg lag sjølv om ein er på båttur. Men ver så snill, ikkje bruk båten etterpå, seier han til NRK.
I mai fortalde NRK om ei undersøking som viste at 99 000 nordmenn førte fritidsbåt med promille i fjor. Undersøkinga var utført for alkovettorganisasjonen «Av og til».
Tre tekne på øysamfunn
Berre på det vesle øysamfunnet Hidra i Flekkefjord vart tre bilførarar tekne for promillekøyring natt til søndag.
Nils Olav Vågen, som bur på øya, meiner at politiet er der for sjeldan.
– Det tungvint for politiet å komme ut med ferja, og det kan vere årsaka til at dei er her så lite. Difor tek folk sjansen på å køyre i påverka tilstand. Eg vart ikkje veldig overraska når dei no tok nokon, seier han.
Fungerande UP-sjef i Agder og Rogaland vedgår også at dei ikkje klarer å kontrollere så mange bilførarar som dei skulle ønske.
– Vi klarer berre å kontrollere eit fåtal av bilane som er på vegen. Vi tek berre ein brøkdel. Men vi har veldig fokus på ruskøyring og prøver å ha så mange kontrollar det let seg gjere. Spesielt no i ferien, seier han.