– Trafikktryggleik og trafikkreglar må foreldra lære barna sine, seier Tom Erik Dønnestad, regionsleiar i Nullvisjonen Agder.
Fleire tusen små førsteklassingar går ut i trafikken i desse dagar. Mange av dei treng hjelpa til foreldra.
– Foreldra må ut og gå, og hjelpe barna å bli trygge på skulevegen.
Vise dei farlege stadene
Nullvisjonen Agder er på skular over store delar av Agder for å øve på trafikkreglane.
– Det er ansvaret til foreldra å øve og vise barna der dei må passe ekstra godt på, understrekar Dønnestad.
Han forsikrar at skulen og Trygg Trafikk framleis er med på opplæringa, men at det er foreldra som må ut og vise kryssa, overgangane og trafikklysa barna møter på vegen.
Halde dei vaksne i nakken
Dønnestad fortel barna at dei vaksne også kan trenge hjelp til å hugse reglane nokre gonger.
Tredjeklassing Stella Ravnaas veit at ho må sjå til høgre og venstre før ho går over gangfeltet.
– Vi må følgje trafikkreglane, ellers kan vi bli kjørt på, seier tredjeklassing Ellie Helen Larsen Eilersen.
– Mamma lærer meg å gå på grønn mann, men pappa lærer meg ikkje det sidan mamma gjer det, seier tredjeklassing Olivia Sjusdal Presterud.
Farlege hekkar
Med så mange barn som skal ut i trafikken – anten til fots, på sykkel eller sparkesykkel, så er sikta viktig.
Dersom hekken din er for stor og sikta forsvinn, så kan det vere ein fare for gang- og sykkelvegen, eller for utkøyringa frå heimen din.
– Hekk-eigarar må tenkje på sikttrekanten. Over fortau og gang- og sykkelvegar må ikkje greiner henge lågare enn tre meter, seier parksjef Aase Hørsdal i Kristiansand kommune.
Ein hekk som er for stor, kan vere ein fare i trafikken.
Foto: Odd Rune Kyllingstad / NRKHo seier du må klippe ned hekkar, buskar og tre som strekkjer seg ut over eigedommen din.
– Barn er låge og synest ikkje så godt bak høge buskar og hekkar.
– Er vi for slumsete med dette?
– Nei, men mange tenkjer ikkje på at vi må klippe hekken på begge sider, så sikta er god, seier Hørsdal.
