Mathisen: – Unggutane pushar oss

– Det kjem opp unge gutar som er veldig treningsvillege og pushar oss. Viss vi ikkje er på jobb kvar einaste dag tek dei plassen vår, seier Mathisen til NRK.

Store deler av fjorårssesongen vart øydelagt av skade for Mathisen. Mot Sørlandslaget fredag var han tilbake i midtforsvaret.

– Å få spele i den gule drakta igjen var veldig gøy. Det har vore mykje kjedeleg trening. Det er framleis ein lang veg å gå, men det fungerte godt, seier Mathisen.

• Les også: Start-stjerne klar for tysk klubb

Imponert over unggutane

Dårleg økonomi kombinert med krav frå omgjevnadene har gjort at Start har henta opp ei rekkje unge spelarar til A-laget.

I dag har klubben seks tenåringar i stallen: Kristoffer Vassbakk Ajer (16), Lars-Jørgen

Salvesen (18), John Olav Norheim (19), Jon Hodnemyr (19), Joachim Holberg Eriksen (18) og Matias Rasmussen (17).

– Å satse ungt tvingar seg fram slik økonomien er. Rasmussen viser at han er ein veldig spennande spelar. Ajer er ekstremt spennande, og det er mange andre som kjem. Det trur eg folk likar, seier Mathisen.

– Så lenge dei presterer skal dei sjølvsagt spele. Vi er nøydde til å ha unggutar som leverer i år, og det ser det ut til at dei kjem til å gjere. Dei er ivrige, pushar kvarandre og er utruleg viktige for Start, seier han.

• Les også: Starts unggutter: – Må hente kaffi til de eldre

Kamp om plassane

Mathisen er berre 27 år, men vert nesten for veteran å rekne i dagens Start-stall. Han understrekar at dei erfarne spelarane kjem til å ta opp kampen for å halde på plassen i laget.

– Eg skal love deg at det skal vere eit par gamle gutar att på laget når vi skriv seriestart i 2015, seier han.

Start står med to sigrar og eitt tap så langt i oppkøyringa. Dei har slått Midtjylland 1–0 og Sørlandslaget 3-0, medan det vart 0–3 tap Aalborg.

13. februar møter dei den nyopprykka 1. divisjonsklubben Jerv til treningskamp.