Det var Andrea Hessen, Astrid Larsen og Sebastian Nuri som representerte 10.-klassingane frå Haumyrheia.
3 av 4 på «Mamma»
I første kategori dukka «Humor» opp. Her vart elevane mellom anna spurt om kva humorprogram Else Kåss Furuseth, Sigrid Bonde Tusvik og Jon Brungot deltek i. Kristiansandarane svara Torsdag kveld frå Nydalen, som er heilt riktig.
I den første kategorien enda dei på 2 av 4 moglege poeng.
I neste spørsmålsrunde trekte trioen kategorien «Mamma». Elevane visste namnet på mora til kronprinsesse Mette-Marit, som er Marit. Dermed scora laget 3 av 4 poeng i den andre kategorien.
I tredje og siste kategori var tema «Hav». Her stilte programleiar Håvard Raustøl blant anna om kva hav som er verdas nest største. Hessen, Larsen og Nuri har nok følgt godt med i geografitimane. Dei tre svara Atlanterhavet, som er heilt riktig.
Finale i mai
I den tredje kategorien vart det til saman 2 av 4 poeng.
Samla fekk Haumyrheia skole med seg 7 av 12 moglege poeng i innleiande runde i Klassequizen.
Klassequizen er ein landsomfattande konkurranse der kvart fylke har sine innleiande rundar. Dei beste laga frå dei innleiande rundane går vidare til lokale finalar.
Til slutt møtest dei lokale vinnarane i nasjonal finale på TV i mai 2013.