– Dette må vere ei av stammødrene, trur eg. Det er ei av dei større eg har sett, seier Otto Bjørn Møller-Hansen i det han løftar ei daud rotte etter halen.
Rotta har gått i fella det siste døgnet og var over eit halvt kilo.
Den er ikkje den einaste som har gått i fella. I løpet av ei god veke er det teke livet av opp mot 700 rotter i eit nabolag i Arendal.
– Eg har ansvar for tilsette frå Kragerø til Flekkefjord. Eg har aldri vore i nærleiken av noko slikt nokon gang, seier Tor Ole Dalen som er dagleg leiar i skadedyrfirmaet Pelias Sør.
Som i ein skrekkfilm
Både dei og privatpersonar har sett ut mange feller. Fellene har blitt tømde heile tida, og det er fylt på med nytt åte.
No har dei kanskje klart å slå ned den største rotteinvasjonen på Sørlandet i nyare tid.
Men folk i nabolaget seier dei nærast føler dei har vore med i ein skrekkfilm.
Rotter har pila rundt hushjørna, komme ut av krikar og krokar og har hengt i trea.
– Det har vore heilt uverkeleg. Du søv ikkje godt om natta. Det er ganske ekkelt, seier Møller-Hansen.
Dette kan vere årsaka
Søppel og hageavfall kan vere forklaringa på «rotteinvasjonen». No ber eksperten folk om å tenke seg om når dei kastar søppel.
– Folk gjer seg sjølv ei bjørneteneste med å ha for mykje kompost i hagen. Søppel er noko rottene elskar. Så søppelhandtering er alfa og omega, seier Dalen i Pelias Sør.
No håpar nabolaget at situasjonen er under kontroll og at dei kan komme tilbake til normalen.
– No håpar eg hovudutbrotet er slått ned med alt dei har teke. Eg kjem til å halde fram med mine feller. Så må vi berre ta det derifrå og håpe på det beste, seier Otto Bjørn Møller-Hansen.
