Det vart slått full alarm hos brannvesenet i 05.45-tida. Ein av brannfolka i kommunen var på veg til jobb då han merka ei merkeleg, sur røykelukt.
– Dette kunne fort ha gått veldig gale om det hadde utvikla seg meir. Det kunne verkeleg ha blitt ein storbrann, seier brannsjef i Setesdal, Jerry Anker Remme til NRK.no.
Gammal trebygning
20 minutt etter at brannen var varsla var det kring 20 brannfolk på plass. Dei hadde fem brannbilar til disposisjon og fekk kontroll over situasjonen.
– Det er ein gammal trebygning, som det har vore ein del folk inn og ut av. Brannen hadde starta i samband med ei scene. Det er ikkje straum på bygget heller, seier Remme.
Han meiner det var flaks at ein av dei lokale brannmennene oppdaga brannen.
– Mistenkeleg brann
– Det tykkjer eg er bra, og slik er det i små lokalsamfunn der vi ikkje har yrkesfolk. Dei spreier seg rundt til alle jobbane sine på morgonen. Så heldigvis vart dette oppdaga tidleg. Så dette har gått bra, seier han.
Brannvesenet omtalar brannen som mistenkeleg. Det gjer at politiet startar etterforsking.
– Brannvesenet jobbar mykje med brannar og har konkludert med at det er mistenkeleg. Det står att å sjå kva som har skjedd, men også eg tykkjer det er mistenkeleg. Så dette må vi undersøkje, seier politibetjent Kim Asbjørn Haugen.
Korleis brannen starta er førebels ikkje kjent.
– Brannen har starta i storsalen. No står det att å sjå om brannen er påsett, eller om det er andre ting som har starta brannen, seier Haugen.