Hopp til innhold

Bandidos tilbake i Kristiansand

Motorsykkelklubben Bandidos tek opp igjen aktiviteten på Sørlandet. Klubben si avdeling i Kristiansand vart reetablert i helga, skriv Fædrelandsvennen.

Bandidos-vest
Foto: Adrian Wyld / Scanpix

Ifølgje avisa deltok to personar frå Kristiansand i eit møte i Drammen i helga der klubben vart reetablert. Klubben har vore nede i fem år i Kristiansand.

– Politiet har fått indikasjonar på at ei reetablering av Bandidos i Kristiansand er i gang. Vi er kjende med møtet som var i Drammen i helga. Førebels ynskjer ikkje politiet å kommentere saka, seier etterforskingsleiar Kjell Erik Eriksen til Fædrelandsvennen.

– Trist og negativt

Arvid Grundekjøn (H)

Ordførar Arvid Grundekjøn

Foto: Øivind Eskedal / NRK

Han påpeikar at politiet vil ha fokus på dei såkalla einprosentklubbane i tida framover.

Ordførar i Kristiansand, Arvid Grundekjøn, seier det er beklageleg at klubben etablerer seg på Sørlandet igjen.

– Det er trist og negativt. Den typen miljø og negative krefter vil vi helst sleppe i byen. Vi er heilt klare på at vi vil kjempe mot den slags med alle lovlege middel, seier Grundekjøn til NRK.no.

– Politiet har fokus på denne utfordringa og vil utvilsamt følgje den opp på god måte i nært samarbeid med oss, som har ansvar og myndigheit i byen. Så det må vi kjempe mot så godt vi kan, seier ordføraren.

Vil kjempe

Kristiansand bystyre har vedteke at dei skal kjempe mot organisert kriminalitet og dei såkalla einprosentsklubbane.

– Overordna mål for politikken er å få eit trygt og godt samfunn med positive verdiar og kvalitetar og stengje ute negative krefter som bryt ned og står for negative verdiar, seier ordføraren til NRK.no.