– Når det er så kaldt at folk vert plaga av det er det litt artig å kunne konstatere at vi har vore med på å setje nye kulderekordar, seier vêrstatistikkar Bernt Lie til NRK.no.
- LES OGSÅ: Kulderekord på Kjevik
– Søndag hadde vi ein døgnmiddeltemperatur på Kjevik som var akkurat 19 grader under normalen. Det normale er minus 0,7 grader. Når ein har ein dag som har vore omtrent 20 grader kaldare enn normalt gir det ein indikasjon på kor ekstremt det har vore, seier Lie.
Heftige rekordar
Allereie i november festa kulda grepet om landsdelen, og det vart rekordkaldt. Dette har helde fram i desember. Ein av dei heftigaste rekordane kom søndag, på målestasjonen på Kjevik i Kristiansand.
Der vart det målt 22,9 minusgrader, og desemberrekorden vart slegen med nesten ei og ei halv grad. Den tidlegare rekorden var på 21,7 minusgrader og vart sett i 1981.
- LES OGSÅ: Kaldeste november på 140 år
– Det er heilt vilt, eg trur neppe eg har sett det før. Det kan nok ha førekomme på Finnmarksvidda eller i indre strok på Austlandet, men ikkje så kystnært som på Kjevik, seier han.
Ny Hovden-rekord
Temperaturane på Kjevik gir eit snitt i desember, som er godt under normalen for Kristiansand.
– 1. juledag etter 25 døgn var månadsmiddeltemperaturen på minus 9,0 grader. Det normale på ein heil desember er minus 0,1 grad. Så ein ligg kvar kvar desemberdag i 25 døgn, i snitt 9 grader kaldare enn normalt. Ein månadsmiddeltemperatur som gir ni grader under det normale er heilt eksepsjonelt, seier Lie.
- SJÅ OGSÅ: Vêret for Aust-Agder
- SJÅ OGSÅ: Vêret for Vest-Agder
På Hovden kjem det stadig nye rekordar. I november fekk vi den kaldaste dagen nokonsinne i Aust-Agder då dei målte 29,9 minusgrader, tre grader kaldare enn den gamle rekorden frå 2002.
Lågaste på 14 år
Dette heldt fram i desember. I går vart det mål minus 33 grader på Hovden, det kaldaste nokonsinne sidan målestasjonen var på plass midt på 90-talet.
– Det er det lågaste i desember for dei 14 åra som Hovden-målingane har vore på noverande målestad, seier Lie.
Statsmeteorolog Børje Johansson er overraska over dei låge temperaturane, men torer ikkje heilt å spå rekord enno.
– Heilt på slutten, 30. eller 31. desmeber kan det bli plussgrader. Det er litt usikkert endå, men om kulda hadde helde fram heilt ut hadde det blitt skikkeleg desember-rekord på Sørlandet, seier han til NRK.no.
Trur på nye rekordar
Men Bernt Lie trur likevel at det har blitt sett nye rekordar når vi kjem inn i 2011.
– Endar det på dette og ein framleis ligg på minus 9 grader som komplett månadsmiddeltemperatur er det 1,4 lågare enn desembermiddelet var i 1981. Over store delar er av Sør-Norge ligg det som det kaldaste i statistikkane, seier han.