– Vi ser etter mistenkelege folk som prøver å komme seg inn på området og kanskje plasserer ut sprenglegemer, og folk som følgjer med på oss for å kartlegge aktiviteten her nede, seier områdesjef for Kvadraturen HV-område, Stig Vang til NRK.
Det er plassert ut soldatar i alle portane inn til hamna i Kristiansand.
Væpna soldatar patruljerer i gatene for å avdekke fiendar.
Øver på krise
Beredskapen i Kristiansand hamn er på topp.
Politiet har måtte be Forsvaret om bistand på grunn av auka risiko for terror og sabotasje. Noko politiet ikkje har ressursar til å takle sjølv.
Denne gangen er det øving. Heimevernet gjennomfører si årlege øving i Kristiansand hamn.
– Det er veldig viktig for oss å øve på det som er vårt reelle oppdrag i tilfelle det skulle bli krise og krig, at vi har trent på det som er reelt, seier Vang.
Kring 130 soldatar
Målet under øvinga er å sikre at aktiviteten i hamna går som normalt.
Kring 130 heimevernssoldatar deltek i øvinga. Blant anna har alle vogntog som kom i land med danskeferja blitt kontrollert.
Ifølgje områdesjefen er norske hamnar spesielt viktige i ein krisesituasjon.
– Difor må vi trene for å bli kjende på objektet vårt Kristiansand hamn for å kunne løyse vårt militære oppdrag best mogleg, seier han.
Overvakar hamna
Med auka terrortrugsel og terrorangrep i Europa meiner han det er ekstra viktig å vere budde.
– Det er klart at det er absolutt mykje meir reelt. Spesielt med terror i ei hamn for å hindre alminneleg ferdsel, seier han.
Også representantar frå hamna deltek i øvinga. I ein krisesituasjon skal Kristiansand hamn bemanne ein båt som overvakar hamna frå sjøsida.
– Vi observerer og rapportere alt frå mistenksam trafikk til å sjekke kaiene før anløp. No har vi fått beskjed om å ligge mellom ferjeterminalen og kai 21 som er området som kan vere utsett, seier hamneinspektør i Kystverket, Govert Kaaløy.
