– Serbia er interessert i å komme hit og spele kamp. Det er heilt fenomenalt, seier sportsleg leiar Torstein Kvam i Jotun.
Det er gått knapt ein månad sidan Danmark slo Serbia 21–19 i ein dramatisk EM-finale i handball for herrar.
No er Serbia tydeleg interessert i å få revansj for tomålstapet.
I ein e-post til Jotun sonderer dei moglegheitene for å komme til Øvre Årdal i perioden Danmark skal vere der på treningsleir i juni.
Trur på bortimot 1000 tilskodarar
– No får vi sjå om vi klarer å få dette i boks. Mykje er opp til oss sjølve no, seier Torstein Kvam.
Danskane sin landslagstrenar Ulrik Wilbæk skal ha vore godt nøgd med opphaldet då det danske damelaget var på treningsleir i Årdal på 90-talet, og no kjem han tilbake til Sogn med herrelaget.
Helst ville Danmark møte Norge, men det norske landslaget er oppteke med VM-kvalik. No kan Serbia bli motstandar framfor bortimot 1000 tilskodarar i Årdalshallen.
– Trenarar og støtteapparatet til Serbia fekk høyre at Danmark skulle vere her. Dette er i ein stille periode for dei beste landslaga, og då vil dei gjerne ha god treningsmotstand, seier Kvam.
(Artikkelen held fram under biletet)
Håpar på plass i dansk TV
Men: det er på langt nær alt som er på plass før partane endeleg kan avtale treningskamp.
Arrangøren ser for seg å dekkje kost og losji for laga, men er ikkje interessert i å betale for reisa. For å klare det økonomiske løftet, er dei avhengige av nye sponsorar.
- LES OGSÅ:
- LES OGSÅ:
– Eg er alltid optimist, og eg trur vi skal klare å få det til. Med kamp mellom Danmark og Serbia, bør det vere greitt å få dekning på dansk TV – og kanskje også norsk. Då kjem også sponsorane, seier Kvam.
Då det vart arrangert internasjonal treningsturnering i Årdal på 90-talet, fekk handballen eit løft. Kvam meiner dette er ein viktig faktor til at Jotun no er på høgt nivå i norsk handball.
No håpar han at ein stor herrekamp også kan løfte herrehandballen i klubben.