Den ser dramatisk ut, Fiskeridirektoratet sin ferske statistikk over fiskefarty.
Men Jarl Magne Silden, leiar i Sogn og Fjordane fiskarlag, meiner utviklinga er naturleg - og har vore naudsynt.
- Hadde vi framleis vore like mange farty som for ti år sidan, så hadde vi berre svolte ut kvarandre. Det hadde ikkje vore liv laga for nokon, seier han.
426 færre farty
Medan det i 2000 vart registrert 715 fiskefarty i fylket, var det i fjor berre att 289. På same tid er også tal fiskarar nær halvert.
Silden fortel bransjen har vore gjennom ei naudsynt omstilling, og meiner det største problemet for næringa er at dei ofte tapar mot høge løner i offshorenæringa.
- Norske fiskarar blir nærast oppkjøpte av offshore-industrien, rett og slett med statlege midlar, seier han.
Blir overbydd
Audun Maråk, generalsekretær i Fiskebåtredernes Forbund, er samd.
Fiskeribransjen blir rett og slett overbydd av den olje- og gassretta offshorenæringa.
- Du har ein offshore-flåte som er sterkt subsidiert av staten, gjennom nullskatt på reiearlaget og gjennom lønnssubsidiar på mannskapet gjennom nettolønnsordninga, seier han.
Lys framtid
Både Maråk og Silden ser likevel lyst på framtida til næringa. Generalsekretæren viser mellom anna til at auka kvotegrunnlag gir auka inntening - ikkje minst for mannskapet på flåten.
- Fiskerinæringa er ei næring som alltid vil vere i Sogn og Fjordane. Trass alt leverer vi eit råstoff som vi produserer rein og næringsrik mat av og er noko som verda treng, seier Silden.