Komande veke må ekteparet i 30-åra møte i Fjordane tingrett. Der blir dei møtt med ein svært alvorleg tiltale etter straffelova paragraf 219, som kan gje opp til seks års fengsel:
«Den som ved å true, tvinge, begrense bevegelsesfriheten til, utøve vold mot eller på annen måte krenke, grovt eller gjentatt mishandler sin eller tidligere eller nåværende ektefelles eller samboers slektning i rett nedstigende linje»
Frå mars 2012 til november 2013 skal dei ha mishandla begge sønene i familien på det grovaste. I tiltalen heiter det mellom anna:
«Dei mishandla sonen/stesonen mange gonger ved å slå han på hendene og/eller på armar og rygg med eit belte, samt tvinga han til å sitje på knea opp over lengre tid»
Blei slegen mange gonger
Den andre sonen i familien skal ha blitt mishandla ved å bli slått mange gonger i ansiktet, halden rundt halsen og halden mot ein vegg, samt at han måtte sjå på mishandlinga av broren.
Det er peika på i tiltalen at dette også gjeld at den eine parten ikkje greip inn mot det som skjedde, eller forsøkte å hindre at mishandlinga skjedde.
Vil følgje rettssaka
NRK har vore i kontakt med aktor i saka, Sissel Kleiven. Ho vil førebels ikkje uttale seg om det som kjem fram i tiltalen. Ekteparet sin advokat, Rune Totland, har ikkje vore tilgjengeleg for kommentar.
Bistandsadvokat for barna, Bente Hermansen, fortel at den eine sonen no er over 18 år og sjølv kjem til å følgje rettssaka.
Bistandsadvokaten vil krevje at delar av saka skal gå for lukka dører når den startar i Fjordane tingrett. Det er sett av tre dagar til rettsforhandlingane.