Om det var grunnen til at skisentera i fylket trakk fulle hus då dei inviterte til open bakke og gratis heiskort sist søndag skal vere usagt. Men alle sentera som lokka med gratis inngang melder om stor pågang.
– I går var det over 700 personar i trekket som fekk stå gratis på ski, fortel billettansvarleg på Harpefossen skisenter, Solveig Høydal.
Sist søndag var det «Åpen Bakke» i dei fleste skianlegga i Noreg. Det betyr gratis heiskort for alle som var påmelde. Målet var at fleire skal få oppleve skiglede.
På Harpefossen skisenter i Eid kommune var det lange køar i trekket med over 1200 besøkande.
–Vi var heldige med vêret, og det var kjempegode forhold. Totalt 1200 personar stod på ski i bakkane, noko som er maks kapasitet og opp under rekord, seier dagleg leiar på Harpefossen skisenter, Morten Storkås.
Tilbod for dei som ikkje har råd
– For mange familiar er det rett og slett for dyrt å kjøpe skikort, eller utstyr for aktiviteten, fortel Bente Nilsen frå omsorgsavdelinga til Røde Kors.
Røde Kors driv tilbodet «Ferie for alle» som tilbyr gratis ferieleir for familiar med dårleg økonomi. I år arrangerer Sogn og Fjordane Røde Kors skileir for familiar.
I vinterferien får heile 58 personar vere med på leir ved Nordfjord fritidssenter i Stryn, og det er heilt gratis. Her får dei stå på ski, og oppleve ein skikkeleg vinterferie.
– Det handlar nesten mest om at barna skal få ein skikkeleg ferie som dei kan snakke om når dei kjem tilbake på skulen. Slik blir forskjellane mellom elevane mindre, forklarer Nilsen.
Familiar med vanskeleg økonomi kan søke om å få vere med gjennom kommunen. I år er det heilt fullt på vinterleiren, sjølv etter at Røde Kors utvida kapasiteten med 8 plassar. Heile 22 personar står på ventelista.
– Pågangen på tilbodet har blitt større og større og vi ser at det er eit stort behov for ei slik ordning, seier Nilsen.