– Krisa er størst i Florø, der vi har slitt over lenger tid, og no har eit akutt behov for folk. I Høyanger har vi óg hatt problem over tid, det same gjeld i Aurland og delvis i Årdal, seier politimeister i Sogn og Fjordane, Johan Brekke, til NRK Sogn og Fjordane.
Pliktår
Måndag skreiv avisa at det er vanskeleg å få utdanna politifolk til å ta jobbar i fylket, og at ein dermed må tilsette ufaglærte.
No kan stipend verte løysinga for å lokke unge politimenn og -kvinner til distriktet.
– Ei løysing kan vere å tilby sommarvikarar frå fylket stipend for det siste året på Politihøgskolen, mot at dei pliktar seg til å jobbe til dømes to år i fylket, seier Brekke.
Lokal rekruttering
Han meiner at ein bør fokusere på å få folk frå distrikta til å søkje seg inn på Politihøgskolen.
– Det vil vere lettare å få dei tilbake til fylket, enn å få folk frå andre fylke til å søkje seg hit, seier politimeisteren.