På 2. juledag ligg bygeområda over heile Vestlandet, ifølgje meteorolog Anne Solveig Andersen ved Vêrvarslinga på Vestlandet.
Laurdag blir finaste dagen
– Ein må nok rekne med ein del snø i dag, ja, men det vil roe seg på kvelden. I morgon blir det for det meste opphald, og det er jo lov å håpe på litt sol, men det kan eg ikkje love, seier Andersen.
Men det betyr ikkje slutten på snøen. Søndag og måndag lavar det ned på ny, og med temperaturane vi har vil snøen ligge i alle fall nokre dagar, ifølgje meteorologen.
Mykje snø på vegane
Ifølgje Vegtrafikksentralen er det kome inn meldingar om mykje snø på vegane.. og brøytemannskapet er i full sving med å rydde vegane rundt om.
– Dei har visst venta på snøen i heile natt, seier operatør i Lærdal, Roger Nedberge Hille.
Han oppmodar folk til å ta det med ro dersom dei skal ut og køyre.
– Alle må tilpasse farten etter høva, og ikkje ta unødvendige sjansar. Det er då ting oppstår, seier han.
(Saka held fram under biletet)
Temperaturane vil stige
Det har vore eit par skikkeleg kalde dagar i landsdelen. Fredag har temperaturane gått litt opp, men framleis ligg dei på rundt 0 i kyststroka, og endå lågare i innlandet.
– Laurdag vil temperaturen gå litt ned att, men frå søndag begynner det å bli mildare. I neste veke blir det mildvêr, men slik det ser ut vil nedbøren komme som snø også måndag, seier meteorologen.
Det vil også vere lite vind å snakke om i dagane framover.
– I kveld dreiar han til austleg retning, men det vil ikkje bli noko meir enn frisk bris på det meste, seier Andersen.