– Vi gler oss veldig til å køyre Sognefjorden på langs denne veka, det har vi verkeleg sett fram til, seier Tommy Gaustad i Digitalradio Norge.
Når radionettet skal skiftast i heile landet, er det mange som har spørsmål. Tanken med å køyre rundt med ein informasjonsbil er at folk skal kunne få praktisk hjelp i nærleiken av der dei er.
– Vi køyrer rundt med den ti meter lange radiobilen vår, og hos oss kan folk få hjelp med det meste. I alle fall om det har med radio å gjere.
Byrjar i Gaupne, vidare til Sogndal.
I dag er radiobilen i Gaupne, Sogndal og Leikanger. I morgon skal dei vidare til Balestrand, Høyanger og Vadheim. Gaustad fortel at dei allereie har svart på mange spørsmål i Gaupne.
REISER RUNDT: Tommy Gaustad og Digitalradio Norge reiser rundt i fylket for å informere folk om DAB, og svare på spørsmål knytt til overgangen til DAB-nett i Sogn og Fjordane 21. juni.
Foto: Martin Steinholt / NRK– Mange lurer jo på korleis ein får DAB i bilen, korleis ein får det på hytta, kor god dekninga er, og så vidare. Folk har mange praktiske spørsmål, og vi vil prøve å svare så godt vi kan, seier Gaustad.
– Er det mange som tek turen innom?
– Ja. Vi rakk ikkje ein gong å parkere i Gaupne før det kom nokon bort. Eg trur vi hadde tre bilar som køyrde etter oss inn her, så folk vegrar seg ikkje for å spør om hjelp.
BYRJA I NORDLAND: Nordland var det første fylket der NRK gjekk over til å berre sende på DAB-nettet, og også det første fylket som fekk besøk av radiobilen.
Foto: Digitalradio NorgeSjølv om NRK går over til å berre sende på DAB i Sogn og Fjordane 21. juni, vil dei kommersielle kanalane halde fram å bruke FM-nettet fram til 15. september. Lokalradiokanalar kan halde fram å sende på FM også etter 2017.
Medietilsynet har ei oversikt over kva slags lokalkanalar som ikkje skal sende på FM etter sløkkinga.