NRK Meny
Normal

Sunnmøring har tilstått kyrkje-hærverk

Ein mann har tilstått å ha gjort skadeverk i Eid kyrkje.

skadeverk i Eid kyrkje

KVITT PULVER: Heile Eid kyrkje er dekt av eit kvitt pulver, etter at den sikta tjueåringen skal ha utløyst to pulverapparat.

Foto: Anders Tesdal Galtung / NRK

Mannen som tidlegare i dag vart arrestert og sikta for hærverk, har no tilstått ugjerningane. Sunnmørsposten skriv at mannen i 20-åra er busett på Søre Sunnmøre.

Kyrkjeverje Kristen Hundeide vart møtt av store mengder glasbrot, eit tømt brannsløkkingsapparat og eit øydelagt orgel då han kom for å inspisere skadeverket i Eid kyrkje i natt.

Kristen Hundeide

USIKKER: Kristen Hundeide seier dei framleis er usikre på om skadeverket vil ha innverknad på kunsten i kyrkja.

Foto: Asgeir Reksnes / NRK

– Det er vanskeleg for meg å vere sikker. Men samla sett trur eg vi snakkar om skadeverk til ein verdi mellom ein og to millionar, seier Hundeide.

Får store følgjer

Det var i 06:30 tida torsdag morgon at politiet melde at dei hadde arrestert ein rusa 20-åring på Nordfjordeid. Mannen er sikta for å ha utført skadeverk inne i Eid kyrkje natt til torsdag.

Hundeide seier at skadeverket får store følgjer.

– Eg har no stengt kyrkja fram til forsikringsselskapet kjem for å taksere skadane. Vi må og ha spesialistar for å reinske kyrkja for pulver. Akkurat no veit eg ikkje når kyrkja kan opne att, men det blir ikkje til første søndag i advent på søndag. Fredag skal det vere ei gravferd her, den blir flytta til Stårheim kyrkje.

Knust vindauge i Eid kyrkje

KNUST: 20-åringen skal ha knust dette vindauget for å kome seg inn i kyrkja.

Foto: Asgeir Reksnes / NRK

– Tragisk

I tillegg til skadane, er kyrkjerommet dekt med kvitt støv frå to brannsløkkingsapparat. Hundeide tykkjer nattas hendingar er tragiske.

– At nokon bryt seg inn i eit hus for å sjå etter verdisaker kan eg til ein viss grad skjønne, men at det skal vere naudsynt å utføre slike skadeverk som dette er heilt uforståeleg. Eg synest det er tragisk og foreløpig veit vi heller ikkje om dette har innverknad på kunsten og måleria i kyrkja.

Den nye regjeringa vurderer å kvitte seg med odelslova. Det kjem ikkje på tale, svarer bøndene.
Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.