Fleire hundre studentar og lokale stod i lange køar for å kome inn på studenthuset Meieriet torsdag kveld. Alle hadde billett og var klare for å få med seg konserten med eit av landets største musikkhåp for tida, house-duoen CLMD.
Innanfor dørene trippar vekaosjef André Rainer Strann og ventar på at huset skal fyllast opp av forventningsfull ungdom. Sjølv er han iallefall heilt klar for verkeleg å setje i gong årets utgåve av den tradisjonsrike festivalen.
FULLT HUS: Carl Louis og Martin Danielle i CLMD på Meieriet under Vekao 2014.
Foto: Geir Bjarte Hjetland / NRKFleir arrangement utselde
– Litt smånervøs var eg sjølvsagt før opningskonserten, men eg håpar alt skal gå greitt både i kveld og i dagane som kjem, seier André og smiler breitt.
Han er vel vitande om at billettsalet til alle dei ulike arrangementa under Vekao går strykande. Mellom anna er konserten med Postgirobygget heilt utseld, det same er til dømes ølkurs og kaffikurs.
Det vil seie at i løpet av dei neste 10 dagane vil Studentsamfunnet i Sogndal ha selt fleire tusen billettar til det som er den største musikk- og kulturfestivalen på vinterstid i Sogn og Fjordane.
- LES OGSÅ:
Alt er basert på dugnad
Men utan alle dei som i løpet av festivalen kler seg opp med "Frivillig T-skjorta", ville det spøkt for heile arrangementet. Her skal ingen tene pengar, alt er basert på dugnad og frivillig innsats.
– Vi har vel litt over 150 frivillige, og det viser seg jo også at det er veldig mange som har meldt seg på aktivitetane vi har på dagtid. Det er eit stort engasjement rundt om i bygda, det er det verkeleg.
– Kva trur du blir ditt eige høgdepunkt under Vekao?
– Eg vil seie høgdepunktet for meg vil vere heile opplevinga, men også det å sjå så mange lukkelege ansikt rundt omkring og sjå at dei verkeleg trivst under heile festivalen.
Sjå alle bileta frå Vekao her:
