Tre skular møtest til fylkesfinale i Klassequizen

Sist ut var Vågsøy ungdomsskule, som greidde åtte poeng. Det heldt ikkje til finaleplass, for då måtte dei ha greidd 10 rette.

Det er det tre skular som har greidd: Sande skule i Gaular, Olden skule i Stryn og Eid ungdomsskule. Desse laga skal møtast til finale på NRK Sogn og Fjordane onsdag 18. mars, direkte i ettermiddagssendinga mellom klokka 14.03 og 15.00.

Vinnaren av fylkesfinalen får ein premie på 5000 kroner, i tillegg til at skulen får representere Sogn og Fjordane i landsfinalen på TV 10. mai.

• Les også: Her finn du resultata frå Klassequizen 2015

Seks skular med ni rette

I alt 31 skular i Sogn og Fjordane har vore med i Klassequien. Quizmaster Stine Kyrkjebø Johansen har sidan ho vitja Vassenden skule i Jølster 5. januar tråla fylket på kryss og tvers for å stille meir eller mindre intrikate spørsmål.

Seks skular hadde ni rette: Vassenden skule, Fjaler ungdomsskule, Høyanger skule, Sagatun skule i Balestrand, Skei skule og Kaupanger skule.