Elevane har verva fadrar, gått med bøsser og selt isbjørnar til den store gullmedalje.
Etter dei siste aksjonane i helga, har dei samla inn 105 000 kroner.
– Det var veldig koseleg og vi fekk kjempegode tilbakemeldingar. Vi forstår at mange ikkje har så god tid midt i julestria, men det var mange som tok seg tid til å snakke med oss, fortel aksjonsleiar Tuva Aasrud.
Aids og malaria
Det er Lions i Sogn sitt engasjement i Uganda som har engasjert elevane. I skuggen av flyktningkatastrofen på Middelhavet, slit landet med si eiga katastrofe.
Svært mange born døyr av malaria. Samstundes tek aids foreldra frå veldig mange born i ung alder. Eit føredrag frå Bjørn Skovly i Lions i Sogn vekte engasjementet til elevane.
– Vi skjønte at vi må fokusere på meir enn ei sak om gangen. Vi set eigentleg ganske passive her i landet, men her såg vi moglegheita for å vere med på noko aktivt saman med Bjørn, seier Aasrud.
Vil ha ein million
Skovly er takksam for arbeidet elevane har lagt ned. Til no har Lions i Sogn samla inn over ein halv million kroner. Med støtte både frå folkehøgskulen og andre Lions kring om i landet, kjenner han seg trygg på at dei skal klare målet; det dobbelte.
Kvar dag døyr 2 500 av malaria. 85 prosent er born under 15 år. Behovet for hjelp i Uganda er stort.
– Eg har vore i Uganda nokre gonger og veit kor mange som døyr av Malaria. Det er like mange kvar dag som det døyr på Middelhavet i løpet av eitt år. Det kan vi ikkje tillate av ein sjukdom som er så lett å overvinne, seier han.
Treng ikkje vere farleg
Eit moskitonett kan beskytte to born frå stikka til malariamyggen. For dei som har 40 kroner til nettet. Kjem ein raskt under behandling, er ikkje sjukdomen livstrugande.
– Eg har sjølv opplevd å komme til sjukehuset i Kampala med eit born. Vi kom for seint. Barnet døydde fire timar seinare, fortel Skovly, som måndag returnerer til Uganda for å halde fram hjelpearbeidet. Då blir han til veslejulaftan.
– Vi skal no starte eit prosjekt for å få 48 foreldrelause jenter ut av slummen og inn i heimar. Til no har vi fått ut 14 born, seier han.
Har mange prosjekt
Lions er ein verdsomspennande frivillig organisasjon. I Norge har dei kring 11 0000 menn og kvinner som ynskjer å bruke noko av fritida til å hjelpe andre.
Mellom anna i Uganda der organisasjonen har utdanna sjukepleiarar for 150 millionar kroner. Og i Nepal der tre millionar born går ein uviss vinter i møte etter jordskjelvkatastrofen i april i år.
– Problemet er at vi gjerne tenkjer ein konflikt om gangen, men eg trur det er viktig å ikkje snu ryggen til andre utfordringar, seier Skovly.