I årets russekull er det fleire som seier tidlegare Førde-russ har hengt litt etter i russeferinga, samanlikna med andre stadar i landet. Difor førebur dei seg no på høge utgifter for å meir ut av tida som russ.
– Vi kjem til å bruke meir pengar enn tidlegare generasjonar, seier Nikolai Eikås.
Gøy å gjere litt ekstra
Gutane i russebilen «Babelaid» nøyer seg ikkje med russebil og russedress. Dei har kjøpt mobildeksel, klede og klistermerker pryda med eigenlaga logo, samt betalt for å få laga eigen russesong. Elevane finansierer utgiftene med arbeid etter skuletid, dugnader og ved å skaffe seg sponsorar.
Fleire russ meiner det er det ein intern konkurranse mellom russebilane ved skulen, noko som gjer at mange vel å bruke mykje pengar på å lage ein russebil som blir populær blant medelevane.
– Det er litt om å gjere å bli den kulaste gjengen med den kulaste bilen, seier Nikolai Eikås.
- Les også:
Mange har også laga profilar på både Facebook, Instagram og Snapchat som dei brukar til å promotere russebilane. Maria Hauken og Kristiane Knutson frå russebilen «Queenbees» meiner konkurransen mellom bilane gjeld også her.
– Mange følgjarar og «likes» viser at russebilen er populær, så det er definitivt eit mål, seier Maria Hauken.
Fullt mogeleg å ha det kjekt for mindre
Russen meiner likevel at eit høgt forbruk og budsjett ikkje er nødvendig for å ha ei god russetid.
– Det blir kva ein gjer det til, det går sjølvsagt an å ha det kjekt utan å bruke så mykje pengar, seier Cedrik Fonn Skåre
- Les også:
Framleis vonar russen at dei sytten festfylte dagane blir verdt alle utgiftene, men seier det er vanskeleg å vite på førehand.
– Det er jo berre fest, så det er ikkje godt å seie kor masse eg får ut av det, seier Kristina Siem frå russebilen «Blue velvet».
Hafstadrussen skal døypast no på laurdag.