Statusen vil gjelde heile strekninga mellom Voss og Sogndal.
Fekk endeleg viljen sin
Det betyr at det er staten og ikkje fylket som vil ha ansvaret for strekninga. Og
ordførar Marta Finden Halset jublar over at kommunen har fått viljen sin.
- Det er vi sjølvsagt glade for. Vi reknar med at dette vert ei naturleg forlenging av stamvegen som er fremja frå Sandnes til Voss, seier Finden Halset.
Dette betyr at riksveg 13 får tilgang til den store statlege pengesekken i staden for at det er fylket som skal ha ansvaret for løyvingane. Håpet er mellom anna at dette skal gjere det enklare å få pengar til ein tunnel under Vikafjellet.
Mindre utgifter
Stortingrepresentant Erling Sande frå Senterpartiet seier at dei statlege kronene vil sikre snøbrøyting og heilårsopen veg over Vikafjellet.
Sande seier fylket får mindre utgifter, men like store inntekter.
- Det er viktig. For dette er eit samaband som ikkje berre er viktig for folk i fylket, men også for andre , seier han.
Tidlegare i år lova samferdsleminister Liv Signe Navarsete at fjellet skal vere vinterope. Og det har Sande stor tru på.
- Rekninga for dette skal staten ta, og fylket slepp. Og akkurat det er eit viktig vedtak for oss, seier han.
- Vil ha tunnel
Arbeiderpartiordføraren i Vik gir samferdsleminister Liv Signe Navarsete stor ære for at vedtaket går gjennom i Stortinget.
No håpar ho at ho er eitt skritt nærmare det gamle kravet om tunnel gjennom Vikafjellet.
- Ja sjølvsagt så er tunnel det fremste ønsket vårt. Det ville gje ein stabil og miljøvenleg veg, og det ville vere ei god løysing, seier Finden Halset.