Vegmeldingssentralen til Statens vegvesen fekk melding om raset klokka 01.03 i natt, og entreprenør var raskt på plass.
– Vi veit at det har kome ned eit tre som sperrar ein del av vegbana, og så er det kome ned ein del småstein og ein del litt større steinar, sa trafikkoperatør Ronny Sleire til NRK i dag tidleg.
Lang omkøyringsveg
Raset skjedde rett vest for Førde, mellom Bjørnsnestunnelen og Erdal, rett ved den vestre tunnelmunninga.
–Det vi er mest redde for er jo rasfaren, og faren for at det kjem meir ned. Eventuelt at det kjem ned eit større ras. Det er mørkt, så det veit vi ikkje før det blir dagslys, sa trafikkoperatøren.
Må vente på dagslyset
Entreprenøren, E. Opedal og sønner, fekk raskt på plass folk i området ved Bjørnsnestunnelen, og dei har halde vakt ved rasstaden i heile natt.
– Vi må få rydda vegbana, og så set vi på trafikk med manuell dirigering, opplyser Steinar Håvik i Statens vegvesen til NRK sin reporter på staden.
