Forskar presenterer lite lystig analyse av fylket

– Det er eitt av fylka som ikkje har vekst, og som har svakast utvikling både i tal arbeidsplassar og innbyggjarar, seier mannen bak rapporten, Knut Vareide i Telemarksforsking.

Negativ spiral

For Sogn og Fjordane er størst på industri, landbruk og fiske, som også har opplevd sterkast nedgang siste åra. Frå 2000 til 2013 forsvann nær kvar fjerde arbeidsplass i desse næringane.

– Fylket har vore veldig uheldige med næringsstrukturen dei siste åra, seier Vareide og vedgår at dette har sendt oss ut i ein negativ spiral.

– Det svekkjer etterspurnaden mot dei andre næringane, gir færre arbeidsplassar og ein del unge menneske flyttar ut, seier han.

Positivt i Gulen

Om rapporten ikkje er noko lystig lesnad, så er likevel ikkje alt kolsvart. Ut frå føresetnaden har næringslivet prestert som venta, og utviklinga er mykje lik den vi ser i til dømes Hordaland, utanom Bergen.

Og i Gulen kan Hallvard Oppedal (Sp) gle seg over å vere ordførar i ein kommune som merkar seg positivt ut med 26 prosent auke i private arbeidsplassar frå 2008 til 2013.

– Det er ikkje overraskande, for vi har mange gründerar som satsar stort. Spesielt i søre delen av kommunen. Så vi har fått opp veldig mykje arbeidsplassar siste åra, seier han.

– Ikkje til å unngå

Ordføraren skulle likevel sett fleire innbyggjarar.

– Men vi held oss omtrent på det same, og har litt vekst. Så vi demmer opp for ein nedgang som vi ser i andre kommunar i fylket, legg han til.

Fylkesdirektør for næring, Jan Heggheim, meiner nedgangen innan landbruk og industri ikkje er til å unngå.

– Bønder og leiarar i industriverksemder jobbar veldig hardt for å produsere mest mogleg, med færrast mogleg hender. Det betyr i utgangspunktet at færre blir sysselsette, men at omsetnad og produksjon går opp, seier han.

Fleire arbeidsplassar

I transportbransjen er det sidan 2000 skapt 186 nye arbeidsplassar. Det er med på å gjere biletet av Sogn og Fjordane meir grått – og mindre svart.

– Vi må skape fleire arbeidsplassar i verksemdene som har nasjonal og internasjonal vekst. Det er i veldig stor grad dei tenesteytande næringane, IKT, helse, ingeniørtenester og ikkje minst bygg og anlegg, seier han.

Mangel på nye arbeidsplassar heng tett i hop med den svake veksten i folketalet. Vareide har berre ei løysing for framtida.

– Den ligg på å få til ei positiv næringsutvikling og skape vekst i næringslivet att.

– Kva om ein ikkje klarer det?

– Då får du ei utvikling som i dag, med gradvis nedgang i innbyggjartal og arbeidsliv.