Store bygningar, glasfasadar og gangbruer kan bli Måløy sin nye «waterfront», dersom Måløy Eiendomsutvikling og Coast Seafood får det som dei vil.
I dag la dei fram eit forslag til korleis området langs sjøkanten i Måløy sentrum kan utnyttast. No er det ei tom utfylling i sjøen, midt i sentrum av kystbyen, men Sverre Søraa i Coast Seafood meiner det er den beste tomta i Måløy, og har store visjonar for kva den skal brukast til.
– Måløy er eit internasjonalt samfunn og det ville vore rart om vi ikkje retta oss mot det internasjonale når vi gjer noko slikt som dette. Dette er fullt mogleg å realisere, seier Søraa.
Imponert ordførar
Vågsøy-ordførar Kristin Maurstad trur planar som dette kan blåse liv i Måløy sentrum.
– Aktiviteten har ikkje blomstra dei siste åra, så vi har behov for meir aktivitet i sentrum, seier ho.
Sentrumsutvikling for fleire hundre millionar kroner er kanskje noko mange ordførarar vil seie «ja takk» til, og Maurstad er som venta begeistra etter å ha sett presentasjonen.
– Det er spenstig og visjonært og har så mykje som vi faktisk treng. Dette dekker mange av våre behov og eg håper verkeleg at dette går i orden, seer ordføraren.
Ho vil at kommunen skal gjere det dei kan for at dette kan bli noko av. Prosjektet treng mellom anna endringar i reguleringsplanane for området, slik at dei kan få lov å bygge så høge hus som dei ønsker.
– Pengane finst lokalt
I underkant av halvparten er eigenkapital, så det kjem til å bli ei stor utfordring å finne pengar til eit slikt prosjekt. Svein Skibenes meiner næringslivet vil bidra, på grunn av verknaden eit slikt prosjekt vil ha for næringslivet over tid.
– Pengane finst nok lokalt i dei bedriftene som vi har i Måløy. Eg er sikker på at vi klarer å få inn dei pengane vi har behov for, seier han, men presiserer samtidig at det enno er tidleg i prosessen.
Det har lenge vore ein debatt i lokalsamfunnet om sentrumsutvikling i Måløy. I dei siste åra har mykje vore flytta til Deknepollen, og nyleg har det vore ein debatt om kvar den nye ungdomsskulen skal vere.
Sjølv om ting har stått litt stille i Måløy, trur ikkje Skibenes det er ein dårleg idé å satse på denne måten.
– Det er ein veldig positiv utvikling i Måløy ved at ein no tar tak og rustar opp, så her er ein del spennande prosjekt. Folk vil sjå ein merkbar forskjell dei neste tre-fire åra, seier Skibenes.