Vegen frå Fåberg, den fremste bygda i Jostedalen, til Styggevatn vart bygd som ein rein anleggsveg då Jostedal kraftverk og Styggevassdammen vart bygt på midten av 1980-talet.
Fleire stader er vegen utsett for skred. I år har svært store snømengd hindra opning i juni.
– Denne vinteren har vore svært spesiell, med til dels store snømengder i fjellet også her i Jostedalen. I tillegg ynskte vi å komme tidleg i gang med anleggsarbeida ved Styggevatn, seier informasjonssjef Norman Kjærvik i Statkraft.
Skredfaren er over
Dermed vart NGI engasjert for å kartleggje og syte for daglege vurderingar av snøskredfaren langs heile vegen frå mars til no.
– No er konklusjonen at vegen er open for ålmenta og folk kan dermed ta turen opp til Styggevatn, seier Kjærvik og minner om at det er viktig å respektere skiltinga ved Styggevassdammen og å parkere på tilviste parkeringsplassar.
Statkraft er i full gang med eit omfattande anleggsarbeid ved Styggevatn, tett inntil Jostedalsbreen kring 1 200 meter over havet.
Byggjer nytt flaumløp
Etter pålegg frå NVE byggjer Statkraft nytt flaumløp på Styggevassdammen, inntaksmagasinet til Jostedal kraftverk.
Kraftverket produserer årleg straum for kring 44 000 husstandar.
– Vi sprengjer ny tunnel, byggjer nytt og større flaumløp og etablerer ein større overløpsterskel. Hydrologiske utrekningar fortel at framtidige flaumar blir større og hyppigare enn ein la til grunn då Styggevassdammen vart bygd på slutten av 1980-talet, difor er det no naudsynt å gjere dette arbeidet, seier Kjærvik.