Sentrumsnært og rett ved sida av E39 på Hafstadflata i Førde, står ein bunker frå andre verdskrig. NRK.no omtalte bunkeren for to år sidan då Sigbjørn Løland Torpe i historielaget i Førde meinte det måtte gjerast noko for å ta vare på bunkersen.
Men måndag starta arbeidet må å rive krigsminnet. Grunneigar Svein Erik Hafstad seier bunkersen blir knust fordi den står i fare for å rase ut.
– For eit år sidan var vi i møte med Førde kommune. Dei fekk tilbod om å overta den, men ville ikkje ha den. Vi fekk beskjed om at den skulle vekk sidan det står utsett til, seier Hafstad.
- LES OGSÅ:
Solide saker med mykje betong
Måndag denne veka blei arbeidet med å fjerne bunkeren sett i gang. Det er ein tidkrevjande jobb.
– Vi snakkar om mykje betong, så den er solid. Veggane er tjukke og den veg visst 60 tonn. Dei som har laga den har gjort skikkeleg arbeid.
Bunkeren står på grus og sand, og det er fare for at den kan rase utfor. Difor må dei vere forsiktige og meisle den.
– Vi har pigg på gravemaskin, som vi hakkar betongen med. Eg trur det går ei veke før den er heilt vekke, seier Hafstad.
Glad den blir vekke
Sjølv om Hafstad må bruke ein del pengar på jobben, seier han det er ein fordel at krigsminnet frå 2. verdskrig blir rive.
– Bunkeren er ikkje freda, og det er eg som eig den. Den har ikkje vore i bruk til nokon ting. Kommunen seier det er fare for folk som går opp der. Det er også eit sandtak med mykje verdiar, så det er greitt at den forsvinn.
(Artikkelen held fram under biletet)
– Skulle søkt om rivingsløyve
Plan- og bygningssjef Odd Harry Strømsli i Førde kommune seier dei ikkje har fått søknad om rivingsløyve på krigsminnet.
– Her skulle det vore søkt om lov til å rive. Det er ikkje gjort. Vi har hatt møte om bunkeren tidlegare, men det blei ikkje fatta noko skriftleg vedtak.
Han seier både fylke og kommune har diskutert kva som skulle gjerast med bygget frå krigens dagar, men at ingen har vist vilje til å gjere noko.
– Av tryggingsgrunnar måtte det gjerast noko. Den var ikkje freda, og vi ville nok gitt positivt svar på ein søknad frå grunneigaren sidan det var fare for at bunkersen kunne rase ut, seier han.
(Artikkelen held fram under biletet)
Må søkje i ettertid
Strømsli seier grunneigar Svein Erik Hafstad vil få eit brev der han blir beden om å søkje i ettertid.
– No er skaden skjedd, og den er ikkje reversibel. Men det må liggje føre eit skriftleg vedtak, og difor må han søkje i ettertid om løyve, seier Strømsli.
Grunneigar Svein Erik Hafstad seier han har fått munnleg beskjed om at den skulle vekk.
– Eg skal søkje i ettertid, det er heilt greitt det. Men eg tykkjer det er greitt å få fram at det er min bunker, ingen har vist interesse og ingen har hatt nytte av den.