Naudetatane rykte ut i 02-tida etter melding om brann utanfor ein kommunal bustad i Gaddevegen.
Dei første opplysningane på politiloggen kunne indikere at bygget var sett fyr på frå utsida. Det viser seg å handle om eit bål svært tett inntil huset.
- Det brann i noko som låg rett utanfor huset. Det vart røyk i leilegheitene, opplyser operasjonsleiar Wenke Hope ved Sogn og Fjordane politidistrikt.
Mann pågripen
Brannen var sløkt etter nokre få minuttar. Huset vart undersøkt av røykdykkarar før bebuarane kunne ta huset i bruk att. Det er førebels uklart kor langt frå huset bålet var fyrt opp, men det skal ikkje ha byrja å brenne i sjølve huset.
Ein rusa mann i 30-åra vart pågripen i 03-tida. Han er ein såkalla kjenning av politiet og mistenkt for å ha fyrt opp bålet. Ingen vart skadde i brannen.
- Mannen skal sitje i arrest til han er avhøyrd. Politiet vil gjere nye undersøkingar på staden på dagtid, seier Hope. I tillegg skal dei fire i bustaden avhøyrast før det vert tatt stilling til kva som skjer med mannen.
Ingen vart skadde
Fire personar vart evakuerte i brannen. Ein vart undersøkt av lege på staden.
- Brannalarmen gjekk, slik at dei fleste kom seg ut sjølve. Brannmannskap måtte hente ut eine bebuaren, opplyser vaktoperatør, opplyser Jan Gunnar Holvik ved Brannalarmsentralen i Florø.
- Var det fare for at brannen kunne smitta inn på huset?
- Det er det alltid når ein brenn bål. Det var slik at det kom røyk inn i bygget.