I dag hadde politiet og representantar frå påtalemakta hatt møte for og sjå korleis dei ligg an med etterforskinga av trippeldrapssaka i Årdal.
– Vi konstaterer at vi er komne veldig langt i etterforskinga, det står att ein del etterforskingsskritt og detaljar, men det er og ting vi vil få på plass i vinter, seier regionlensmann i Indre Sogn, Åge Løseth.
Sidan den sikta ikkje er avhøyrt vil politiet ikkje seie noko om kva som står att. Løseth vil heller ikkje kommentere om den sikta var rusa eller visste at han skulle sendast ut av landet.
Tiltalen let vente på seg
Det er litt over to månadar sidan Valdressekspressen vart kapra og tre menneske vart drepne om bord. Den sikta er ein mann i 30-åra frå Sør-Sudan, som denne veka vart flytta til St. Olavs hospital i Trondheim for vidare observasjon. Der vil han bli vurdert av psykiatrisk sakkunnige i inn til 12 veker.
Åge Løseth seier det som står att av etterforsking lokalt ikkje er spesielt vanskeleg, men at det likevel vil ta fleire månadar før Statsadvokaten vil få over saka til vurdering fordi mange viktige rapportar ikkje er klare.
Kan ta fleire månader
Innan tre veker håpar Løseth at rapporten frå Kripos sine teknikarar og den endelege obduksjonsrapporten vil vere klar. Men rapporten frå dei psykiatrisk sakkunnige vil truleg ikkje vere klar før utpå våren.
– Når trur du Statsadvokaten tek ut ein tiltale?
– Det tek tid med alle rapportar og så må påtalemakta sette seg inn i saka, så det kan ta fleire månadar.
Interpol har ikkje funne venen
Ein ven av den sikta vart sendt ut av landet like før trippeldrapet. Interpol er kopla inn for å prøve å finne mannen, men så langt har dei ikkje lukkast med dette seier Løseth
– Interpol jobbar framleis med å finne han slik at han kan avhøyrast, men eit slikt avhøyr er ikkje avgjerande for saka.