Alpinbakkane jublar, men ute i terrenget er skredfaren stor

Det er med positivt forteikn at ein kan melde om supre skiforhold, og ikkje minst ei godvêrshelg ein kan nyte skiforholda i.

Men det er med varsemd. For det er stor skredfaren både i Sunnfjord, Nordfjord og på Sunnmøre.

• Les også: Slik kan du vurdere skredfaren i påskefjellet

– Det har snødd to-tre dagar i strekk no, og skredfaren er tre på ein femgradersskala. Det betyr stor sjanse for skiløparar å utløyse skred i heng brattare enn 30 grader, seier skredforskar Kristensen.

Åtvarar skientusiastar

Det er utanfor tilrettelagde område risikoen er størst for at skred kan bli løyste ut. Og ofte er det skiløparane sjølve som løyser desse ut.

• Sjå: Oppdatert vêrmelding hos yr.no

– Held ein seg innanfor tilrettelagde område, så er det ofte greitt, seier Kristensen.

• Les også: Dette bør du gjere om du kjem først

Dette er Kåre Tonning ved Stryn skisenter vel klar over. Torsdag gjekk det eit snøskred i Karifjellet – ein halv kilometer frå det eine skitrekket.

• Sjekk: Snøskredfaren hos varsom.no

– Vi åtvarar og prøver å snakke folk med sekk og randonee-utstyr vekk frå enkelte område. Vi forlanger også å få vite kvar dei køyrer om noko skulle skje, seier han.

Luksusproblem

I og rundt skisenteret i Stryn har det siste dagane kome to meter med snø. Med andre ord ligg forholdet godt til rette for ei god helg for både pudderkongar og pudderdronningar.

• Sjekk: Vêrvarsel for norske alpinanlegg

Og dei som likar seg på heilt vanlege alpinski i slalåmbakken.

– Eg kan ikkje hugse sist det kom så mykje på så kort tid. Vi skulle gjerne porsjonert det utover, men dette er eit luksusproblem vi jublar over. To meter snø på fire dagar bergar påska og langt utover våren tenkjer eg, seier han.

Forholdsreglar

Skredforskar Kristensen vedgår at sjølv om snøen kan vere både fin og flott, så er det knytt stor fare med den når ein beveger seg utanfor den preparerte alpinbakken.

Det er mange forholdsreglar ein kan ta før ein legg ut på tur.

• Les også: Lokale snøskredvarsel kan berge liv

– Det viktigaste er å tenkje på kvar ein ferdast. Snakk med kjentfolk så du ikkje rotar deg borti bratta. Er du blant dei som køyrer bratt og vurderer snøforhold, er det viktig å ha med det som finnast av tryggleiksutstyr, seier han og legg til:

Snakk om minuttar

– Airbag-sekk, spade, søkestong og sendar/mottakar er tinga du bør ha med. Å grave i snøen med ski eller hender tek for lang tid. Ha difor med ein lett aluminiumsspade.

• Les også: Opprettar beredskapsgruppe for snøskred

Ein sendar/mottakar gjer ein lett å finne om ein skulle bli gravlagt av snømassar. Når uhellet først er ute, skil det berre minuttar frå ein lukkeleg til ein tragisk utgang.

– Tida er nesten alltid avgjerande. Blir ein teken, så tek det ikkje mange minuttane før ein kan bli medvitslaus, seier han.