Hydro investerer 82 millionar i ny støypeteknologi i Årdal og Høyanger

Pengane skal brukast til justerbare og fleksible støypeformer. Dette gjer verka i stand til å støype meir avanserte legeringar. Samstundes vil dette gjere det sikrare for operatørane.

Det skal brukast 57 millionar i Årdal og 25 millionar i Høyanger, seier fabrikksjef Wenche Eldegard ved Hydro Høyanger. I Høyanger har dei ei stund hatt prøveproduksjon med den nye teknologien. Det er grunnen til at det skal brukast mindre pengar der enn i Årdal.

– Strategisk viktig

Konserndirektør Hilde Merete Aasheim i Hydro seier investeringa tek sikta på å gjere Hydro betre i stand til å forsyne bilprodusentane i Europa med aluminium.

Metallet blir i stadig større grad brukt i bilane, for å gjere dei lettare og meir miljøvenlege, seier Aasheim.

– Investeringa er strategisk viktig for oss. Bruken av aluminium i bil er på rask frammarsj. Fot å bli vinnar i denne marknaden må vi utnytte både teknologi og kompetanse fullt ut.

– I Høyanger og Årdal er vi kjende for å vere gode på både drift og kvalitet, men vi har til no mangla teknologien som trengst for å levere dei produkta som fleire av bilprodusentane spør etter, seier Aasheim, som er konserndirektør for primærmetall i Hydro.

– Må utnytte kompetansen vår

Den nye støypeteknologien blir kalla AFM, som står for adjustable, flexible moulds, på norsk justerbare, fleksible støypeformer. Teknologien er utvikla i samarbeid mellom Hycast, som er eit dotterselskap av Hydro, og forskingsmiljøet ved aluminiumverket på Sunndalsøra.

Fabrikksjef Egil Fredriksen ved Hydro Årdal seier ei slik satsing må til for å nå opp i den sterke konkurransen innan aluminiumindustrien.

– Skal vi vere konkurransedyktige mot dei som produserer i lågkostland er vi nøydde til å utnytte kompetansen som sit i den høgt utdanna organisasjonen vår. Bilindustrien har banka på døra vår i lang tid fordi dei veit at vi er veldig gode på kvalitet.

– Mindre risiko for operatørane

Han legg og vekt på at den nye teknologien gjer arbeidet tryggare for operatørane.

– Det nye systemet automatiserer både starten og slutten av støypinga. Då blir operatørane mindre utsette for risikoen som er knytt til flytande metall. I tillegg kan ei ny støypeform erstatte opp mot sju gamle. Dermed blir det mindre byting av former og med det mindre bruk av truck og kran.

Produsert nær 4000 tonn

Den nye støypeteknoloigien har sidan februar i år vore testa ut ved Hydro Høyanger, med godt resultat, seier fabrikksjef Wenche Eldegard.

– Det har gått veldig bra. Det har svart til forventningane våre på alle område. Vi har fått tilbakemeldingar frå kundane våre, og dei har gjennomgåände vore positive.

Testanlegget i Høyanger har sidan det kom i gang støypt i underkant av 4000 tonn. På lengre sikt er målet at all støypinga i Høyanger skal skje i dei nye formene. Men det fører ikkje til fleire arbeidsplassar, seier Eldegard.

– Det gjer det ikkje. Det blir omtrent der vi er i dag, og så får vi sjå om vi greier å effektivisere på bemanninga på lengre sikt.

Og i ei tid då aluminiumprisane er på eit lågt nivå er det viktig at Hydro får betre betalt for produkta frå dei nye støypeformene.

– Med denne teknologien kjem vi oss inn på ein marknad der marginane er større og der det er større mogelegheiter. No har vi eit heilt anna spekter å tilby kundane, og det er noko kundane våre har spurt etter.

• LES OGSÅ: Satsar mot bilmarknaden i Europa med ny teknologi