Det er duka for særs tøffe og spennande forhandlingar om ordførarvervet i Flora. Høgre vart den store valvinnaren, men er berre nokre få prosentpoeng større en Arbeidarpartiet og sitjande ordførar Bente Frøyen Steindal.
Venstre sit med den politiske jokeren i Flora. Det partiet som vil ha makta må nemleg ha støtte frå dei. Og kravet frå Venstre er ikkje lite.
– Vi skal ha ordføraren, seier toppkandidat for Venstre, Jan Henrik Nygård til NRK.no.
- LES OGSÅ:
Må samarbeide med Venstre
Høgre gjorde eit brakval i kystkommunen. Med ein framgang på 18,6 prosentpoeng fekk partiet 35, 6 prosentpoeng av stemmene og vart største parti. Men like bak følgjer Arbeidarpartiet med 32,7 prosentpoeng av stemmene.
Jokeren Venstre har i underkant av 15 prosentpoeng oppslutnad og står no med gode kort før forhandlingane om kven som skal smykke seg med ordførarkjeda i Flora.
– Hovudkravet vårt er at Venstre skal ha ordføraren. Det partiet som vil ha støtte frå oss, og såleis få fleirtal, må gje oss det vervet, seier Nygård.
- LES OGSÅ:
- LES OGSÅ:
(Artikkelen held fram under biletet)
Høgre: – Heilt uaktuelt
Men valvinnar Bengt Solheim-Olsen har ikkje tenkt å gje noko ordførarkjede ved dørene. Han avviser blankt kravet frå Venstre som dei siste fira åra har hatt varaordføraren.
– Vi går i forhandlingar for å skape eit politisk fleirtal som går for ein meir offensiv politikk for kommunen. Det er sjølvsagt heilt naturleg at den store valvinnaren i Flora, nemleg Høgre, skal ha ordførarvervet, seier Solheim-Olsen til NRK.no.
Han seier Høgre vil vere rause i forhandlingane, men held fram at det er heilt uaktuelt å forhandle om kven som skal ha ordførarposisjonen.
Kan risikere å stå att utan noko
Det er då sjølvsagt mogleg at Venstre går til Arbeidarpartiet med same krav og vinn fram, men Solheim-Olsen håpar Venstre vel Høgre.
– Venstre har styrt saman med Ap i fire år allereie. Det har ført til store økonomiske problem og lite framgang. Eg håpar Venstre hoppar på eit lag som skal få fart på kommunen framover, seier Solheim-Olsen.
– Men kan dokke risikere å stå att utan noko dersom Venstre og Ap inngår samarbeid?
– Det er alltid ein fare for det. Vi går for å sikre oss ordførarvervet. Vi håpar fleire parti ønskjer å skape ein politikk som gir oss ei spennande framtid og ikkje tilbakegang slik vi har opplevd til no, seier Solheim-Olsen.
Forhandlingane startar i ettermiddag
Nygård har fått same svaret når han har presentert Venstre sin krav for Høgre. Han vil likevel halde godt fast på kravet om ordførarposisjonen når dei går inn i forhandlingar med Høgre og Ap onsdag ettermiddag.
– Vi har alle dei småpartia i Flora i ryggen når vi krev ordføraren. Skal vi få reell innverknad, så må vi ha ordføraren, seier Nygård og legg til:
– Det er eit ufråvikeleg krav frå vår side.
Det har førebels ikkje lukkast NRK å få noko kommentar frå sitjande Ap-ordførar Bente Frøyen Steindal om krava til Venstre.