Ho er noregsmeister i motbakkeløp

– Heilt utruleg. Det er veldig kjekt med tittelen som noregsmeister, jublar Eli Anne Dvergsdal.

Med tida 57.48 kan Dvergsdal frå IL Gular krone seg med tittelen noregsmeister i motbakke. Stian Angermund Vik frå Varegg IL vann herreklassen med tida 46:10. Tittelen som noregsmeister er noko Dvergsdal ikkje har frå før av.

– Dette var tittelen eg mangla i samlinga mi. No er den i boks, seier Dvergsdal.

Det var med blanda kjensler Dvergsdal sprang i mål. Etter fem kilometer stivna låra til noregsmeisteren.

– Eg ville prøve på ei god tid, noko som kan føre til ein smell undervegs. Det gjekk veldig bra i fem kilometer, før eg stivna litt. Då blir det tungt på slutten. Ein amerikansk løpar tok meg igjen, så eg skulle ønske eg var med på å spurte om sigeren.

• Les også: Tok sølv i EM i motbakkeløp: – Det største eg har opplevd
• Les også: Sjå nøye på desse bileta: Denne kombinasjonen er heller uvanleg

Ville prøve på løyperekord

Dvergsdal hadde håpa på ein løyperekord, men stive lår sette ein stoppar for planen.

– Eg følte eg opna kontrollert og i ein ganske passeleg fart. Eg kjende at det gjekk veldig bra i dag, så då ville eg gje litt på. Når ein prøvar på tøffe ting, så er det ein sjanse ein tar. Det var tungt og vonde tankar dukkar opp.

I løypa hadde det samla seg mykje folk som heia både med flagg og kubjøller. Det var noko den nybakte Noregsmeisteren sat stor pris på.

– Opp mot toppen var stemninga heilt topp. Det var mange personar som heia på meg, inkludert sambuaren min og mamma. Kjekt at mange tar turen og lagar god stemning i fjellet, fortel Dvergsdal.

Mot slutten i løypa gjekk det betre for Dvergsdal som kunne jogge inn til mål.

– Det losna litt når eg hadde heldt på ei stund, så eg kunne jogge ganske lett i mål.

• Les også: Ho vart berre slått av langrennsstjerna

Molden opp

Det var Molden Opp i Luster som arrangerte noregsmeisterskapet i motbakkeløp. Arrangørane kunne melde om ny rekord i talet på påmelde.

– Vi har hatt rekordstor påmelding med over 970 deltakarar. Når alle kjem seg både opp og ned, så må vi vere nøgde. Det har gått veldig bra i dag, seier løpsleiar John Ingar Bukve.

Løpet går frå Tørvis Hotell i Marifjøra ved Lustrafjorden og like opp til Molden som ligg 1116 meter over havet.

– God stemning med mykje folk. Det har vore mange ivrige som har heia deltakarane fram. Løparane har kome med gode tilbakemeldingar, så dette har vore ein strålande dag, avsluttar Bukve.