Her blir Ole Johannes og kona ein del av statistikken - rekordsommar for redningsoppdrag

Ekteparet fall fleire meter ned i ein issprekk. Hjelpelause ringde dei etter hjelp.

– Ein liten augneblink tenkte eg: «No døyr du. No er du ferdig», fortel Ole Johannes Øvretveit.

Fleire må bergast

Tre veker har gått men han blir framleis skaka når han ser bileta frå bergingsaksjonen. Ein fottur i den rekordvarme julisommaren førte brått sunnfjordingen og kona inn det som er ein rekordstatistikk for den norske redningstenesta.

NRK.no fortalde torsdag at hovudredningssentralane på Sola og i Bodø har opplevd ein markant auke i talet på redningsoppdrag denne sommaren. På landsplan er auken 14 prosent. Det fine sommarvêret og stor utandørs aktivitet får skulda.

• LES OGSÅ: Rekordvêret fører til fleire oppdrag enn vanleg for redningshelikoptera

Resultatet blir ofte at eit av Forsvaret sine seks operative Sea King redningshelikopter, eller ein luftambulanse må rykkje ut. Sistnemnde vart berginga for ekteparet Øvretveit frå Sande i Sunnfjord.

(Artikkelen held fram under biletet.)

Bakken rivna

Det heile skjedde så brått, minnest Øvretveit.

– Vi gjekk der stien er merka. Vi var komne omtrent hit, seier han og peikar på eit bilete i eit avisoppslag på iPaden. Øvretveit, som til dagleg er journalist i Firda, skreiv tidlegare denne veka sjølv i eiga avis om opplevinga. Bergingsaksjonen vart foreviga av ein dansk turist som var i området.

«Hit», var ei snøfonn nær Geiterygghytta. Ekteparet skulle gå frå Finse mot den populære hytta i Aurland.

Dei følge den oppmerkte stien, men då dei kryssa ei snøfonn mot Geiterygghytta, rivna underlaget under beina deira. Begge falt ned i den enorme sprekken.

(Artikkelen held fram under biletet.)

Hadde mobildekning

Kona ropte« Ringt 112!». På ei hylle, omringa av glatte isveggar og ei elv av isvatn, hadde dei mobildekning. Øvretveit klarte å ringe etter hjelp. Han fekk beskjed frå operasjonssentralen å ikkje legge på.

Ein belgisk turist titta fram over kanten. Han kunne ikkje mykje frå eller til. Hjelpe kunne derimot luftambulansen, stasjonert i Førde, gjere. Dei rykte ut, slik dei har gjort så ofte denne sommaren. 20 prosent auke i oppdraga er så langt fasiten

ved utgangen av juli månad.

• LES OGSÅ: Her får du sju nye fjellvettreglar
• LES OGSÅ: Slik øver dei: Bli med på øving med redningshelikopter og redningsskøyte utanfor Stad

– Det er mange som er ute i terrenget. Vi merkar at det er meir å gjere når det er fint vêr, enn når det er dårleg vêr, seier Hans Ivar Kuberød som er andrepilot ved luftambulansen i Førde.

(Artikkelen held fram under biletet.)

Berga etter ein time

Etter ein time nede i issprekken høyrde ekteparet rotorblada frå den gulmalte luftambulansen over hovudet. Men dei såg det ikkje.

– Når eg høyrde lyden, då tenkte eg at no nærmar det seg, fortel Øvretveit.

Helikoptermannskapet hadde med seg tau og anna redningsutstyr. I løpet av nokre minutt var turgåarane ute i friluft. Men støkken sit i. Sjølv om dei var godt førebudde, og hadde med seg utstyr, gjekk det gala. Øvretveit er takknemleg for at dei fekk hjelp når de trengde det som mest.

– Utan helikopteret, er det ikkje godt å seie korleis dette hadde enda.