Her aukar folketalet mest

– Det er veldig kjekt. Vi har lagt bak oss nokre dårlege kvartal dei siste åra og difor er det ekstra kjekt å få eit godt kvartal som gjer at vi passerer 13 000 innbyggarar for første gong, seier ordførar i Førde Olve Grotle.

Torsdag formiddag slapp Statistisk sentralbyrå befolkningsstatistikken for andre kvartal 2016. I Sogn og Fjordane auka folketalet med 302 personar, dei store vinnarane vart indre Sunnfjord og indre Nordfjord. Innanfor grensene til den nye storkommunen i indre Sunnfjord var folkeauken på 116 personar, det er Grotle nøgd med.

– Det er viktig at alle kommunane i fylket har vekst, også dei kommunane som ligg rundt tettstadane. I indre Sunnfjord har vi ikkje hatt så stor vekst på mange år. Det er ekstra kjekt at dei kommunane vi skal slå oss saman med har ei god utvikling.

Femte størst

Indre Nordfjord var den andre av dei store folketalsvinnarane det siste kvartalet. Aller best gjekk det med Eid og Stryn som hadde ein vekst på 31 og 34 personar. Eid passerte med det Vågsøy i folketal og er no den femte mest folkerike kommunen i fylket. Ordførar i Eid, Alfred Bjørlo, seier dette er svært gledelege tal for Eid.

– Folketalsvekst er alltid positivt og det som gjer denne målinga ekstra kjekk for oss i Eid kommune er at vi har ein jamn vekst på alle område. Vi har både fødselsoverskot og fleire som flyttar hit enn som flyttar bort, det er kjempekjekt å sjå.