Vinteren har øydelagt for milliardar

Sterk kulde, kombinert med enorme mengder regn og snø har ført til store øydeleggingar av vegar over heile landet.

40 milliardar i etterslep

Berre på dei kommunale vegane er etterslepet på vedlikahald nærmare 40 milliardar kroner, og med våren kjem det fleire dyre overaskingar for kommunane.

For vegane er holete og øydelagde. Det har Hallstein Dvergsdal i Jølster merka. Med mobiltelefonen sin målar han djupna i ei stor hole.

– Du ser det er så djupe spor at det snart ikkje er mogleg å køyre bil her. Med litt fart ned i denne, kan eksosanlegget ryke med.

– Rotnar på rot

For Jølster kommune er budsjettet allereie sprengt på grunn av mykje brøyting og strøing. Men kommunen må ta seg råd til å også reparere skadene etter vinteren, om folk skal kunne ferdast trygt.

Driftsjef Bjørn Anders Steinsund i kommunen seier det vil gå ut over andre ting.

– Det blir mindre vedlikehald på barnehagar, skular, sjukeheim og andre kommunale bygg.

– Norge går så det susar, men rotnar på rot, sukkar han.

Regjeringa: – Kommunane må prioritere

Kommunaldepartementet seier at kommunane har fått så mykje meir pengar at dei bør ha råd til å prioritere vedlikehald.

Men direktør for interessepolitikk, Helge Eide, i kommunane sin interesseorganisasjon, KS, seier det er vanskeleg å få pengane til å strekkje til.

– Kommunane har enorme oppgåver, men rammene er gjevne. Innanfor det må ein prioritere. Konsekvensen av dette er at ein prioriterer tenesteområdene framfor vedlikehald. Det er i alle fall situasjonen i 2011.