Har valt nytt Helse Førde-styre

Styret i Helse Vest har i dag vore samla der dei har utnemnt nye styre i helseføretaka i regionen.

Dei nye styremedlemmene trer inn i verva frå i dag av, og skal i utgangspunktet sitje i to år.

Regjeringa har lagt føringar om at talet på styremedlemmer skal reduserast, og i Helse Vest er talet på styremedlemmer er etter dagens val redusert frå 54 til 39.

I Helse Førde ser det nye styret slik ut:

• Jorunn Ringstad, leiar
• Agnes Landstad, nestleiar (NY)
• Atle Hamar (NY)
• Liv Stave
• Harry Mowatt
• Helge Bryne
• Randi Aven (vald av og blant dei tilsette)
• Wenche Kristin Røkenes (vald av og blant dei tilsette)
• Berit M. Johanssen Hornnes (vald av og blant dei tilsette)
• Geir Berge Øverland (vald av og blant dei tilsette)

Krf-politikaren Trude Brosvik er dermed ute av styret, det same er kommunelege Knut Cotta Schønberg i Luster og Anni Felde, tidlegare helse og omsorgssjef i Gloppen kommune.

– Høg kompetanse

Styreleiar Terje Vareberg i Helse Vest seier han er godt nøgd med det nye styret i Helse Førde, der altså fire får halde fram, medan to er nye.

– Vi har lagt stor vekt på å finne styremedlemmer med kompetanse som er tilpassa det utfordringsbiletet helseføretaket har. Vi har sett både på nødvendig kontinuitet og fornying i styra, og geografisk spreiing og kjønnsbalanse, seier Vareberg og held fram.

– Medlemmene har høg kompetanse og variert bakgrunn, og er klare til å ta fatt på viktige oppgåver i spesialisthelsetenesta. Eg er godt fornøgd med samansetjinga av styra, seier han.

Atle Hamar er direktør i Lotteri- og stiftelsestilsynet og har politisk erfaring, mellom anna som statssekretær for Venstre.

Den nye nestleiaren i styret, Agnes Landstad, er tidlegare direktør i Vestlandsforskning og no dagleg leiar i Forskningsinstituttenes Fellsareana i Sogn og Fjordane. Ho har vore utviklingsdirektør i Helse Førde tidlegare.

Landstad går rett inn som nestleiar.

– Vi reknar det som trygt at dei nye, på same måte som dei etablerte, er gode styremedlemmer som kvar for seg har viktig kompetanse å bere med seg til styrebordet, seier Vareberg.

Styremedlemmene som er valde av og blant dei tilsette har ikkje vore på val no.

(Artikkelen held fram under)

Forstår at ho blir skifta ut

Tidlegare Gulen-ordførar og Krf-politikar Trude Brosvik har ikkje noko problem med at ho ikkje får halde fram i styret.

– Eg synest det er bra at eigaren, Helse Vest, tek jobben med å setje saman nye styre ut frå nye kriterium. At dei ikkje berre forlengjer for alle viser at dei tek oppgåve si som eigar alvorleg, seier Trude Brosvik til NRK.no etter valet.

Det har nemleg kome signal om at styra i helseføretaka ikkje lenger treng bestå i stor grad av politikarar, og talet medlemmer skal også ned. I Helse Førde er styret redusert frå 11 til 10 medlemmer.

– Eg har skjønt at dette ikkje handlar om tillit til den jobben eg har gjort eller noko anna. Frå eigar og departement er det sagt at talet styremedlemer skal ned, og ein ikkje skal vere så bunden opp i at det skal vere politikarar, seier Brosvik.

– Ønskte du å halde fram?

– Eg har ikkje sagt at eg ikkje ville. Så hadde eg blitt spurt hadde eg nok halde fram i ein periode til. Men dette er ikkje noko vondt for meg, understrekar Brosvik.

Ovanfor Brosvik har styret mellom anna vist til at Brosvik kjem frå eit område som søkjer seg mot eit anna helseføretak. Gulen har nemleg søkt seg frå Helse Førde til Helse Bergen. Det ønsket får ikkje støtte frå Brosvik.

– Eg beklagar at Gulen ikkje vil halde fram som ein del av Helse Førde, fordi eg meiner det er ei god løysing for kommunen, seier den tidlegare ordføraren.

Knut Cotta Schønberg har førebels ikkje vore tilgjengeleg for kommentar.