– Det er med stor sorg vi har teke imot meldinga om at Håkon Fimland natt til søndag sovna stille inn i barndomsheimen til kona Kari i Innvik i Nordfjord, skriv ordførar i Førde, Olve Grotle og rådmann Ole John Østenstad i ei pressemelding.
Fimland vart 74 år gamal.
Han har sidan 1976 arbeidd i Førde kommune. Først som dagleg leiar for det nye kulturhuset i Førde, Førdehuset. Seinare som kultursjef og kommunalsjef fram til 2012. Dei siste åra har Fimland vore prosjektleiar for utbygginga av Hafstadparken i Førde, og han var fram til det siste i aktivt arbeid i kommunen.
Fimland var i tillegg ein profilert friidrettsutøvar. På spesialdistansen 110 meter hekk har Fimland sju NM-titlar frå 1970–1976. Han vart nordisk meister 1971, og han deltok i EM 1969 og 1971 med semifinaleplass som beste resultat. Han var utteken til OL i München i 1972, men måtte melde forfall på grunn av skade.
FRIIDRETTSPROFIL: Håkon Fimland har fleire medaljar frå friidrettsbana. Her i duell med blant anna Kjellfred Weum.
Foto: Knut Edvard Holm– Håkon Fimland vil bli hugsa som ein stor idrettsmann og samfunnsaktør som har vore sentral i utviklinga av Førde-samfunnet, skriv Grotle og Østenstad.
Dei fortel at tankane i dag går til familien.
– Ein heidersmann er gått bort. Vi tenker på kona Kari og dei tre borna Heidi, Håkon Andre og Ola Richard med familiar.