Biletet vart teke vest for Solund, tidleg onsdag morgon.
– Eg kan sjå kva som helst. Var det grassat rein luft, så kunne det i prinsippet vore Shetland. Men det er umogleg, seier Jan Asle Olseth om draumelandskapet Geir Olsen fanga på kamera onsdag morgon.
Holmar eller skjær
Biletet har fascinert mange og på Facebook-sida til NRK Sogn og Fjordane har det kome mange framlegg til kva spegelbilete kan vere av. Men tåke på Shetland og låge skyer ikkje så langt frå kysten stengjer ute den skotske øygruppa.
Olseth trur løysinga ligg nærare enn som så.
– Eg ville tru at det er eit spegelbilete av noko som er høvesvis nær. Då landar eg på at det kanskje er skyer, eller kanskje meir blanding med skjær som ein elles ikkje ser, seier han.
– Optisk fenomen
Det er i veldig klart vêr, og når forholda mellom kald og varm luft ligg til rette for det, at luftspeglinga skjer. Då står fram objekt på horisonten som strekt og opphøgd.
Slik som draumelandskapet Olsen tok bilete av.
– I prinsippet kan ein faktisk sjå ting som er spegla langt vekke frå. I arktiske strok, der det er lite vassdamp i lufta, kan du sjå temmeleg mykje lenger enn her, seier Olseth og avsluttar:
– Dette er eit optisk fenomen. Desse fenomena er det mange av i naturen. Det er om å gjere å ha augo med seg, og eg oppmodar folk til å bruke fantasien sin.