Sogndalelevar gav ein halv million kroner til vennskapsby i Sør-Afrika

Torsdag overrekte elevrådsleiar Helge Evensen Bjørkum sjekken til ordførar T. B. Zulu under ei tilstelling ved Sogndal vidaregåande skule.

Pengane er eit resultat av Internasjonalt Dagsverk for Eshowe, og skal gå til barnehageutbygging/samfunnsføremål.

– Vi er veldig takksame for bidraga frå Sogndalselevane, sa ordføraren under overrekkinga.

(Artikkelen held fram under biletet)

– Meiningsfullt

Beløpet er ikkje heilt ubetydleg for den afrikanske vennskapskommunen til Sogndal. Det er også grunnen til initiativet frå elevrådet ved Sogndal vidaregåande skule.

Med seg til Norge, hadde ordføraren bilete av bygginga som alt er utført der nede.

– Den mest meiningsfulle dagen i skuleåret, skildra elevrådsleiar Evensen Bjørkum om arbeidsdagen.

Imponert guvernør

I Sør-Afrika har «sogndalsbarnehagen» fått namnet «Joyway», som står for det engelske ordet for glede og dei siste bokstavane i «Norway».

Guvernør i Eshowe, Stan Larkin, takka elevane for innsatsen for eit ikkje like priveligert område som i Norge.

– Eg hadde ikkje trudd at elevar kunne samla inn så mykje pengar, rosa han elevane.