Politiet har i løpet av natt til søndag tatt seg av fleire rusa personar som laga trøbbel for seg sjølv og andre. Det starta med høg musikk frå ei leilegheit i Florø sentrum like over midnatt. Vedkommande fekk pålegg om å dempe musikken.
Par-mekling
Nærmare klokka 01 måtte politiet rykke ut til eit husvære i Førde der ei kvinne og ein mann rett og slett var rykande ueinige.
Ein mann i 20-åra var rusa og politiet sette mannen i arrest. Vedkommande kom også med ukvemsord overfor politiet og dette blir han meldt for.
I Florø måtte politiet rykke ut til slåsting i sentrum klokka 01.57. Ein person slo til ein annan. Politiet mistenkjer ein mann i 20-åra for å stå bak slåstinga.
Vedkommande vart køyrt heim og fekk pålegg av politiet om å halde seg vekke frå sentrum. Politiet ved Flora politistasjon vil følgje opp saka.
Stakk av frå politiet
Klokka 02.43 vart nok ein mann slått i Florø sentrum, og teken hand om av helsepersonell. Politiet skriv i loggen sin at dei kjenner identiteten til mistenkte som stakk frå staden. Politiet ved Flora politistasjon vil følgje opp saka.
Siste melding om rusa person i Florø kom til politiet klokka 03.36. Vedkommande var så rusa at personen vart køyrt heim av politiet.
I Sogndal møtte ein politipatrulje ein firhjuling i halv firetida midt i sentrum med tre personar på. Vedkommande vedgjekk at det var overlast og vil få eit førelegg.