- Når dei vel å ikkje høyre på oss, er det tydeleg at dei gjer det for å slå tilbake for at vi har andre meiningar enn dei, seier Djuvik.
- Eg trur gamlingane er redde for å få konkurranse.
Nominasjonskomitéen til Framstegspartiet i fylket foreslår Åge Starheim og Thorbjørn Lie på dei to første plassane til stortingsvalet neste haust.
Keisame kandidatar
Djuvik har tidlegare kritisert Sogn og Fjordane Framstegsparti for å ha for keisame kandidatar. I same slengen sa han at ungdomspartiet FpU burde få topplassen før stortingsvalet neste år. Han har også sagt at fylkesleiar Åge Starheim har drive senterpartipolitikk.
Lars Svein Drabløs seier lista skal ut på høyring. (Foto: NRK)
Vil ikkje ha han
Og no vil altså ikkje nominasjonskomitéen ha Djuvik som kandidat til stortingsvalet neste år. Men leiar i nominasjonskomitéen til Frp i Sogn og Fjordane, Lars Svein Drabløs, nektar for at dei fjernar ein plagsam kandidat.
- Nei, nei, nei. På ingen måte, seier Drabløs. Han seier den førebelse nominasjonslista no skal ut på høyring i lokallaga.
Reiakvam, som sjølv sende ut pressemeldinga i går om at ungdomspartiet var svært skuffa over nominasjonskomitéen, var i går ikkje tilgjengeleg.
Ifølgje Djuvik vil Reiakvam ikkje stille over han på lista. No lurer Djuvik på korleis partiet skal kunne nå ut til ungdom i fylket, når ungdomspartiet blir neglisjert av nominasjonskomitéen.