Foreldre til barn ved Vassenden skule vil ikkje finne seg i at elevane må ha symjeopplæringa i Jølstravatnet.
Bakgrunnen er eit spareforslag på grunn av kommunen sin tronge økonomi.
– Alt for kaldt
– Som foreldre tenkjer eg at det er altfor kaldt i Jølstravatnet til at det kan kan erstatte den vanlege opplæringa i eit oppvarma basseng, seier Eirik Hjelmbrekke.
Han er far til ein elev i andre klasse ved Vassenden skule.
I staden for å busse elevane frå Vassenden til bading på Skei, føreslår skulen å la elevane bade i Jølstravatnet frå mai til oktober.
Hjelmbrekke stiller óg spørsmål ved kor mykje kommunen sparar på eit slikt forslag.
– Det ein sparar på busstransport vil fort bli brukt opp ved at ein må kjøpe nytt utstyr til å ha ved Jølstravatnet, seier Hjelmbrekke.
Ikkje informert
Hjelmbrekke seier til NRK at han først vart kjent med saken via media, og at han ikkje har fått nokon informasjon frå skulen.
- Nokre vil kanskje synes det er kjekt, mens andre vil kvi seg på å bade, og dermed kan det bli ei splitting i klassen, seier faren.
Han peikar på at for elevar med astma vil det vere ubehageleg å bade i så kaldt vatnet.
– Sporty forslag
Leiar for oppvekst, kultur og helse i Jølster kommune, Arve Dvergsdal seier forslaget kom frå skuleleiinga.
– Dei meiner elevane vil få ei betre symjeundervisning ved å ha den i Jølstravatnet, enn ved å skysse elevane til Skei, seier Dvergsdal.
Han trudde saken var diskutert i utvala på skulen, og beklagar at foreldra ikkje er blitt informerte om forslaget. – Det er beklageleg. Det rekna eg meg var gjort, seier Dvergsdal.
– Ein av foreldra kallar forslaget luftig og trudde det ikkje var alvorleg meint. Kva seier du til forslaget?
– Eg kan ikkje seie anna enn at i utgangspunktet virkar det som eit veldig sporty forslag.
Dvergsdal legg til at ein er nødt til å drøfte forslaget før det eventuelt vert gjennomført.
Drøfting måndag
Saken kom til kommunen før sommarferien.
– Vi hadde forslaget opp i eit møte før sommarferien, men sendte ho tilbake fordi vi lurar på kor mykje vi sparar økonomisk på dette forslaget, og om det finst andre moglegheiter, seier Dvergsdal.
– Trur du det er realistisk?
- Det er eit av spørsmåla vi må drøfte på møtet på måndag som kjem, seier Dvergsdal.